Shillong, Nailar 08: Ka seng KSU mynta ka sngi kala leit ban pynlong ia a jingiakhih biang ha khmat jong ka ophis jong ka Meghalaya Public Service Commission (MPSC)ban pynpaw ia ka jingpyrshah ba kim hun ia ka jubab kaba la pynmih na ka MPSC ha kaba ia dei bad ka resolt Prelims ka MCS.
Ha kane ka jingiakren na ka liang jong ka KSU la lam khmat da u Genenral Secretary u samla Donal V Thabah ha ka jingiaren bad u bah P R Marwein shongknor MPSC bad ki mat kaba kila ia kren la ia soi da ki ar liang mamla.
Kawei na ki mat ba u shongknor ka Meghalaya Public Service Commission (MPSC) u la kular ban pyllait paidbah ia ki marks jong baroh ki nongiakhun ia ka eksam Meghalaya Civil Service (Preliminary) hapoh ka 24 kynta hadein ka jingiakhih jong ka seng Khasi Students’ Union (KSU), kaba dawa ban don ka jingthungkam haba shit haba shai.
Ia kane kane ka jingkular jong u Chairman ka MPSC ka la wan hadien ba ka la don ka jingia kynduh lang ha pdeng u Chairman ka MPSC bad ki Dkhot ka KSU ia ka ba la long mynta ka janmit ka 8 tarik u Naikar 2024.
Ha ka jing iakren bad ki nongthoh khubor na ka liang u President ka KSU CEC u bah Lambok Marngar u la ong ba ki mat iakren bala buh jingthoh jong kane ka Jingialang bala iasoi da baroh ar kynhun kala ong ba ka MPSC kala mynjur ban pyllait paidbah ia ki marks jong baroh ki nongiakhun ia ka eksam, kiba la iakhun ia ka MCS (Prelims) Examination hapoh ka 24 kynta.
U la ong ruh ba ka Commission kala kular ruh ban pynmih ia ka answer key kynthup ia ki answer key kiba bakla bad kiba la pynbeit lem bad ki lai tylli ki jingkylli kiba bakla ha ryngkat ki jubab kiba dei hapoh ka 24 kynta.
U la ong ruh ba ka KSU kala dawa ruh ba ia ka personal interview jong ka kam Meghalaya Police Service dei ban leh kat kum ka jingpynbna laitkam ba pynmih nyngkong ha u 2019 ha kaba ka ratio ka dei ban long 1:2:5 ym kum ka Office Memorandum ba thymmai kaba la pynkylla sha ka 1.1:5.
U la ong ruh ba ka KSU ka dawa ba ka personal interview bala buh ban long ha ka 20 bad 21 tarik Nailar, 2024, dei ban pynsangeh noh tad haduh da pynbna da kumwei pat. Ki roll nombor ki dei ban long ka juh na ka Prelims tad haduh ka Personal Interview jong ka Meghalaya Civil Service Examination.
Ia ka jingpynbna ba 6 tarik Nailar, 2024 dei ban khein iap noh bad ia ki marks dei ban buh ha ki rynsan paidbah. U la ong ruh ba u Chairman ula pan por halor kane khnang ba un ioh iakren ha ka jingialang bad kiwei pat ki dkhot ka Commission.
