New Delhi, Naitung 09: Ha ka jingthmu ban ai mynsiem ia ki nongbei tyngka bad kiba seng kam lajong ban pyniar ia ki kam karkhana ha ka thain shatei lammihngi.
U Myntri Sorkar Pdeng ba dei khmih ia ka Tnat Commerce and Industry, Shri Piyush Goyal u la iashim bynta ha ka prokram pyniasoh bad ki karkhana bad ki nongbei tyngka, ka Samvad – 2024 ha Itanagar, Arunachal Pradesh ha ka 8 tarik Naitung 2024.
Ia kane ka prokram la pynlong da ka Tnat Promotion of Industry and Internal Trade (DPIIT) kaba la sakhi ia ki jingpynshai shaphang baroh ki skhim jong ka DPIIT, ryngkat bad ka UNNATI-2024 jong ka Tnat Commerce and Industry.
Ha kane ka jingialang, u Myntri u la pyllait ia ka Handbook for Registration and Claim Guidelines na ka bynta ka UNNATI-2024ha ka jingiadonlang u Myntri Rangbah ka jylla Arunachal Pradesh Pema Khandu.
U u Myntri Sorkar Pdeng ba dei khmih ia ka Tnat Parliamentary and Minority Affairs Kiren Rijiju bad kiwei kiwei ki myntri. U Bimal Borah, Myntri ka Tnat Industry, Sorkar Assam u la iadonlang ha kane ka jingialang.
Ha ka jingialang iamir jingmut halor ka skhim UNNATI, ki nongbei tyngka na ki jylla ka thain shatei lammihngi ki la iasam ia ki jingsngew jong ki bad pynpaw ka jingsngewnguh ia ka sorkar kaba la wanrah ia ka polisi ban pynkylla ia ka jinglong ki kam ba iadei bad ki karkhana ha ki jylla ka thain shatei lammihngi bad ban kyntiew ia ki lad ioh kam ioh jam.
Ki nongbei tyngka na ki kam bapher bapher ki la iasam ruh ia ki jingshem jong ki bad ki sienjam kiba rim jong ka Sorkar India. Ki nongbei tyngkai ki la ai jingmut ban kyntiew shuh shuh ia ka skhim UNNATI, kynthup ka jingbit jingbiang ki karkhana kiba sdang ha u sneem 2022-24 bad pynduna ia u pud jingbei tyngka na ka bynta ki kam kiba rit baria, bad kiwei kiwei ki jingai jingmut.
U Goyal u la pynthikna ban peit bniah bad shimkhia ia ki jingai jingmut jong ki dkhot. U la pynshlur ruh ia ki ban bei tyngka katba lah. U Myntri ka Tnat Commerce and Industry u la sam ruh ia ki syrnot sha 10 ngut ki nongpyniaid ia ki kynhun treikam kiba la pynrung kyrteng hapoh ka skhim UNNATI.
