Shillong.Jylliew 10: Hadien ba ki kam poh jong ka Sonam Raghuvanshi ka ba la pyniap klep iala u kurim u Raja Raghuvanshi ha ka jingleit jngoh kai pyrthei ha sohra, ka seng Hynñiewtrep National Youth Front lyngba u samla Tyllibor Swer ka la mih ban pynrem bad ban dawa pan map na kito ki briew kiba kynnoh ba ka jylla Meghalaya ka dei ka ba sniew.
Ha ka kyrwoh khubor ba la phah sha ki lad pathai khubor ka seng Hynñiewtrep National Youth Front ka la pynpaw ba ha ki por ba ka seng ka pynlong ka jingkhynra ia ki nongwan jngohkai pyrthei ha umtngar ka sneng ka la mat shibun ki jingshah kynnoh bad shah kynthoh, hynrei ka seng lyngba kane ka kyrwoh khubor ka la pynpaw ba ka seng ka khynra ia ki briew ki ba wan nabar, ym ba ka seng ka pyrshah ia ka tourism.
U bah Tyllibor Swer u la ong ba ka jylla Meghalaya ka la don ka aiñ ka ba dei ka MRSSA, ha kaba ha ka Section 18 (E) jong kane ka aiñ ka kdew ba entry bad exit point kiba don ki dei ban lum jingtip ia ki briew ki ba rung ba mih hapoh ka jylla Meghalaya, hynrei ka sorkar jylla haduh mynta kam lah ban pyntreikam ia ka MRSSA.
Shuh shuh u la ong ba haduh mynta hi ki briew ki ioh ban rung ban mih laitlan, dei namar ba ka entry bad exit point kam treikam. Lyngba ka tourism ka la dei kawei na ki lad ba ki briew ba nabar ki iohlad ban wan ha ka jylla bad ban leh ia ki kam sniew.
“Ha ka kyrteng jong ka jingwan jngohkai ki wan sha ka jylla Meghalaya, hynrei kine ki briew ki pynmih ia ki jingshah kynnoh kaba ymlah ban pdiang ia ka jylla Meghalaya”.
Ka seng ka phah ia ka khubor sha ka sorkar ba ka dei ban peit pyrman bha ia ka jingwan rung kyrthep ki nongwan jngohkai pyrthei, la ka jingwan jong ki ka dei thik tang ban wan jngohkai pyrthei ne ban wan ban buhai shnong lyngba ka tourism.
