Shillong, Nohprah 12: Ka seng kynthei Jaiaw Langsning mynta ka sngi ka la pynhap pyrda noh ia ka jing leh kmen jubili ksiar ka ba la pynlong ha phyllaw jong ka community hall jaiaw Langsning ha kane ka jing pynhap pyrda noh mynta ka sngi.
Ha kane ka sngi la wan ban ia don bynta lang da u bah Paul Lyngdoh MLA kum u kongsan ha ryng kat ka jing ia don lang u bah Banteidor Lyngdoh MLA kum u symbud kongsan bad ka kong Costimai Jyrwa kum ka symbud kongsan bad kiwei kiwei pat ki riew rang bah jong ka shnong Jaiaw .
Ha ba ai jing kren ha kane ka sngi na ka liang u bah Paul Lyngdoh u la ong ba ka Jaiaw Langsning ka la long ka wei na ki shnong ka ba don ia ka thong ha ka ban wan rah ia ka jing kylla ha jylla bad u la ong ruh ba ka jaid bynriew jong ngi ki khasi ka dei ka ba kyrpang ha ka ba ngi khaot ka imlang ka sah lang ka ba ngi ia trei lang la ka long ha kino kino ki kam ba ngi don la ka long ha kino kino ki bynta.
U la pynpaw ba ki seng kynthei ki dei kiwei ki a juh kyrshan bha ia ki dorbar shnong bad ruh ki ba peit ngor bha ia ka suk ka sain ha ki shnong ki thaw, u la bauh ruh ka jing kyntu ia ki seng kynthei ba kin ai jing ia trei lang ha ka ban wan rah jing kylla ia ka imlang ka sahlang kham tam ha kane ka por ba ka sor ka don ha ka jing ia khun pyrshah ia u drugs.
U la ong ba ma u kum u MLA ki don ki shnong ki ba wan ban pan jing iarap kam pynroi hynrei ka long sep ei la da kum ki dorbar shnong kim lah ban tei ia ka jing im ki khun samla ha ka ba bun na ki khun samla ki la ngop ha u drugs.
U Bah Paul u la ong ba ka long ka ba ishyrkhei ha kine ki sngi ba u drugs u la poi wat sha duh ki dong ki shnong ki ba kyndong jong ka jylla. kumta u la buh ka jing kyrpad ia ka seng kynthei jaiawlangsning ba kan wan shakhmat ha ka ban ia trei lang bad ka sorkar ha ka ban ia leh pyrshah ia drugs.
La ioh ka jing kren lyng kot na u Bah Banteidor Lyngdoh u ba la pynpaw ka jing sngew kmen bad ai ruh ka jing iaroh ia ka seng Kynthei jong ka Jaiaw Langsning ka ba la bytien lynti ia ki khun samla bad ia u ruh kumjuh.
U la pynkynmaw ruh ia ki por jing long samla jong kum u khynnah u ba shong ba sah ha poh kane ka dong u la juh ioh ban Ia shim bynta ha bun ki kam jong ka dong ha ka ban kyntiew ia ka Jaiaw Langsning bad kham tam ia ka seng samla Jaiaw Langsning.
U la ong ruh ba ka theme ka ba ka seng kynthei ka buh ka dei shi sha ha kaba dei ki long kmie ki ba btien lynti ha ka ba ma u ruh u sa lah ban long kum u MLA u ban kit ban bah ia ka khia ka shon jong u paid bah.
Ha kane ka sngi na ka liang u bah Banteidor Lyngdoh u la ai ruh ka jing iarap song pisa ka ba 1 lak tyngka sha ka Sengkynthei ba kan lah ban pyntyllun ia ki jing don kam jong ki.
Ha kane ka sngi la pyn shong kun shuh shuh ia kane ka sngi da ka jing rwai na ka seng Kynthei Jaiaw Langsning, na I Bahunshisha Marwein bad kumjuh ruh ka short skit na ki dkhot ka seng kynthei Jaiaw langsning.
Ha kane ka sngi la ioh ruh ban sam ia ki prize sha ki nong jop ha ki jing ia leh kai ba pher ba pher ba la pyn long da ka sengkynthei, la ioh ruh ban sam ia ki mementos sha ki nongialm ba rim jong ka seng kynthei jaiaw langsning ki ba la noh synniang ha ka ban pyntyllun ia ki kam ka seng. La ioh ruh ban pynhap noh ia ka lama jong ka seng bad ruh ka jing kyrkhu pynwai na u Rev Maxwell Shangpliang.
La sdang ia kane ka jing ialang pynhap pyrda da ka jing duwai na I bah Johnson Majaw, la pynbud pad da ka jing ai syntiew sha u kongsand bad ki symbud kongsan, nangta pad la ioh ia ka jing kren pdiang na ka kong Mirth Lilian Blah ka ba long ka President jong ka Seng kynthei Jaiaw Langsning. La ioh ruh ban pyn sngew ia ka report jong ka seng da ka kong Angela Lyngwa ka ba dei ka Joint secretary.
