Shillong,Lber 10:U Myntri ba dei peit ia ka tnad pynroi nongkyndong u A.T. Mondal haba jubab ia ki jingkylli jong u Rupa Marak la ong ba ki kyndon ban pyntreikam ia ka skhim PMAY.G la hap bud ryntih kumba la bthah ia katei ka skhim shna iing.
Kiba dei ban ioh ia kane ka skhim shna iing ki dei ban long hapdeng ka rta 16 haduh 59 la dei kynthei ne shynrang ruh ki dei ban long khlieh jong ka iing khamtam eh ka dei ban long ka kynthei bad lada baroh na kata ka iing ba nang ban thoh bad kiba palat ia ka 25 snem.
Haba jubab ia ki jingkylli bynrap ka jingjied ia kiba dei ban ioh ia kane ka skhim ki dei ban long kiba duk ki dei ban don ia ka kard trei shispah sngi dei ban don ia ka Aadhaar kard ia kane ka jingjied la peit lang da ka VEC bad ki Gram Sevak bad kan long kyrpang na ka bynta ki SC,ST bad ki bym don iing.
Ka jingjied ia ki nongioh ka long katkum ka khana samari jong u snem 2011 la buh ruh ia u snem 2018 kaba ka jingjurip ka dang iaid bad kane ka skhim kan dang neh haduh u snem 2029.Ha kajuh ka por kito kiba la don ia ka iing dewbilat,kali lada ka kamai ka la kot ia ka T.15,000/- tyngka shi bnai kin nym ioh shuh ia kane ka skhim shna iing.
