Shillong, Nailar 06: U Deputy Commissioner jong ka West Khasi Hills District u Bah T. Lyngwa u la pynmih ia ka jingpynbna paidbah ba lada lap ia kiba pynsaphriang khlumar ha kaba ia dei bad ka COVID-19 shisnem yn set ha phatok.
Katkum ka jingpynbna kaba la pynmih ha ka 03/08/2020 la ong ba ka ophis kala ioh jingtip ba ki don ki briew kiba juh mlien ban pynsaphriang ia ki khubor lamler ha kaba ia dei bad kane ka COVID-19 bad kane kala wanrah ia ka jingsyier ha ki paidbah.
Kane kala wanrah ia ka jingsyier ha ki shnong ki thaw ki dong bad ki thain khlem da ioh ia ka jingpynshisha na ka tand ka koit ka khiah jong ka sorkar jylla. Kane ka jingpynphriang ia ki khubor lamler ka long pyrshah ia ka Disaster Management Act, 2005.
Katkum kane ka ain ka long ba lada lap ia kito kiba pynphriang ia kum kine ki khubor lamler kin shah kem bad yn set phatok shisnem ryngkat bad ka kuna. Na ka liang jong u DC u la kyntu ia ki paidbah ba kin kiar na ka jingpynsaphriang ia ki khubor lamler.
