Shillong, Lber 16: U Myntri Rangbah ka jylla u Cornad K Sangma myntri ba dei peit ia ka tnad suwari haba jubab ia ka jingkylli jong u bah Mohendro Rapsang ha kaba ia dei bad ka jingwan ki nongwan jngohkai suwari la ong ba kila don haduh 26123 ngut.
U Myntri Rangbah u la ong ba kane ka jingkhein ka long naduh ba la plie ia ka jaka rung jaka mih ha ka jylla naduh ba la sdang ha u bnai Nohprah 2020, la iathuh ba ha bnai Nohprah 2020 kiba la register ki long 5551 ngut, ha u Kyllalyngkot 2021 ki long 9558 ngut, ha u Rymphang 2021 ki don 9664 ngut bad ha u Lber haduh ka 4 tarik ki long 1350 ngut.
U Myntri Rangbah u la jubab ruh ba kala don ka jingud ia ka jingduh na kiba ia don bynta ha kiba pyniaid ia ki kam ba don jingiadei bad kane ka kam Suwari bad na ka liang jong ka sorkar ruh kala ia leh ban iarap katba don la lat.
Haba jubab ia ki jingkylli bynrap na ka liang jong u myntri rangbah u la ong ba kam don kata kaba jingiarap kaba don kyrpang, kawei kaba ka sorkar ka leh ka long ba ia kito kiba shimwai ia ki jaka sorkar kiba ia dei bad kane ka kam suwari ka sorkar kala map ia kabai wai kaba la kot sha ka T.1.82 klur, kumjuh ia kito kiba shim wai ia ki jaka jong ka MTDC.
Ia kito ki iing basa kiba dei jong ki riew shimat ka sorkar kala iarap da kaba buh ia ki kum ki Corona Care Centre bad ka jingsiew na ka bynta baroh ki iing basa kala kot sha ka T.20 klur tyngka bad ka sorkar kala siew palat shiphew klur ka bad kaba sah mynta ka long T.8.9 klur.
Kiba wan sha ka jylla Meghalaya ki hap ban reghister online bad ki lah ban register ynda ki poi ha kine ki jaka rung jaka mih bad kane ka jingregister kan long beit banioh ia ka jingkhein ia kiba wan kai sha kane ka jylla, kane kam don jingiadei bad ka MRSSA.
