Shillong, Iaiong 21: U Commissioner bad Secretary ka tnat Pule Puthi u Vijay Kumar mantri mynta ka sngi ka 21 tarik u ïaiong 2025 u la lum ia ka jingialang ban iakren iatai sani bha ha kaba iadei ka jong ka jingthmu jong ka tnat pule puthi ban shimti ia ki skul SSA.
“Palat 2000 tylli ki SSA skul napdeng ki 3000 tylli, kiba pyniaid da ki Shnong, kila ai ia ka No-Objection Certificate ban aiti noh ia ka bor pyniaid sha ka Tnad Education ka Sorkar”
Ia kane la pyntip da u President ka Meghalaya SSA School Association Bah Aristotle C Rymbai hadien ka jingialang bad u Commissioner & Secretary ba khmih ia ka Tnad Education Vijay Kumar Mantri lem bad ki DSEO, SDSEO bad lai tylli ki seng ki nonghikai ba kynthup ka All Meghalaya SSA School Teachers’ Association (AMSSASTA) bad ka Meghalaya Fourth Teachers’ Association (MFTA).
“Mynta ka sngi, u Commissioner & Secretary ula ai ia ka jingkheiñ ba iadei bad ka jingioh lum ia ki NoC na ki skul shnong halor ka jinglong ba kloi jong ki ban aiti noh ia ka bor pyniaid na ka SSA sha ka tnad Education. Na ki 3000 tam ki skul shnong ha jylla, la ioh pdiang haduh 2000 tam ki NoC” ong u Bah Aristotle
Haba iakren bad ki nongthoh khubor, 23 tylli ki skul shimet na East Khasi Hills ki la aiti ia ka NoC ba ki kloi ban aiti noh ia ka bor pyniaid na ka SSA sha ka tnad education, ula pyntip ruh ba ka jingialang la iakren bniah ruh halor ka jingbym long ryntih ha ka jingai ia ka jingpynbna sha ki SMC ba iadei bad ka jingai NoC ba ki kloi ban aiti noh ia ka bor pyniaid sha ka tnad education.
U bah Aristotle Rymbai u la pynpaw ba hadien ka jingiakren kaba sani bha, ki la iashim rai lang ba kin sa ai biang ia ka jingpyntip sha baroh ki SMC ki bym pat shym la ai NoC ha ryngkat ka jingpynshai kaba shai bha halor kane ka sienjam ba la shim da ka tnad education ban pan ia ka jinglong kloi jong ki ban aiti ia ka bor pyniaid sha ka tnad, nalor kane, u la pyntip ruh ba la iakren ruh halor ka jingpynbeit ryntih ia ki Nonghikai SSA bad ka Sorkar.
U la ong, naduh u naiwieng 2024, ki la iakren ia kane ka mat bad ka tnad education ka la iaid la jan hynriew bnai mynta bad hynne ka sngi hadien ba ki la iakren sani bha, ki la shim ia ka rai ba ha shuwa ban kut u jymmang, dei ban pyndep noh ia baroh ki kam ki jam ban pynbeit ryntih ia ki nonghikai.
