Kliar Iktiar Jied Kyrtong: Bah Raphael Warjri

Ka aïom jied kyrtong na ka bynta ban mihkhmat sha ka Dorbar Thawaiñ ka Jylla ka la ha thmit. Kumta la sngew dei ban jied ia kane ka mat na ka bynta ban ia tai bad ia tip paidbah. Ka ba nyngkong eh ka long ba ka jingthmu kan long ka ba myntoi ia ki paidbah, ia ka sorkar bad ia ki kyrtong ki ban ia aireng ha ka ne ka khep ba mynta.

Kumta la don ka jingiasyllok bad u kher rangbah ha ka kam jied kyrtong sha dorbar thawaiñ ha jylla, u Bah F. R. Kharkongor, Kher-rangbah Kliar-iktiar Jied-lamkhmat (Chief Electoral Officer) bad uwei pat u rangbah u ba la jylliew ka jingtip ia ka ktien Khasi bad u kaitor rwai sur tynrai Khasi ba pawnam, u Bah Phyrnai Marbañiang; ki ba la pynshlur ban pyrshang ia kane ka bynta jong ka jynthoh.

Jar la katta ki kyntien ba thaw hi kin long tang ka jingtyrwa ba donkam ban jurip sani da ki riewtbit ha kane ka liang, shwa ban pdiang ne pynskhem. U Bah Phyrnai Marbañiang u la kyntu ban kham adkar ha ka ba pynsnoh kyntien na ka bynta ban thaw hi da kano kano ka ktien thymmai.

U la ai nuksa ba ka kyrteng shnong Umdih-ar ha ka rukom kren ki briew mynta ka kylla Umdi-har, ka ba kdat na ka jingmut tynrai ba ka dei ka shnong ka ba don ka shyngyiar um dih ia ki ar tylli ki kur ha kata ka shnong. Kum kine ki jingkdew la shem ruh ha kiwei kiwei ki ktien ki ba lah ban pdiang bad ki ba ym dei ban pdiang.

Kum ka nuksa ka shnong Lawsharai, la pynman ktien mynder Lalcharai; ka Lumshimer la pynman Lachumiere, ka kyrteng shnong Sohra la pynman Cherra bad pynsnoh sa ka ktien nongwei Punji ba la sah budnam Cherrapunji, ka thaiñ Shylla Hat ka la kylla Sylhet bad jahduh syndon sha palat pud bad kam trai ha Ri Bangladesh, bad ki ba kum kita ter ter.

Ki don pat ki ktien ki ba la pdiang ha ka thoh ka tar wat lada ki dei ki ba kylla na ki ktien tynrai; nuksa kum ka ktien mon-jur ka la kylla mynjur, ka ktien jur-bor ka la kylla jubor, ka ktien khun-lung ka la kylla khyllung, ka ktien lang-doh ka la kylla lyngdoh, ka ktien batriti ka la kylla lyngkut batri, bad kumta ter ter. Shwa ban poi sha ka phang la thawhi katto katne ki kyntien ki ba iadei bad kane ka mat bad kita ki long kumne harum:

Chief Election Commissioner- Khliehbor Kliar-iktiar Jiedlamkhmat: Khliehbor (chief) ka mut u ne ka kher rangbah u ba don ka bor ba kha khlieh duh na ka bynta ban korbar ia ka kam jied kyrtong na ka bynta ka Dorbar Thawaiñ Ka Ri ne Jylla; Jiedlamkhmat (Election)  ka mut ka kam Jied paidbah ia ki kyrtong ki ban long nongialam bad ban mihkhmat sha ka Dorbar Thawaiñ ka Ri ne Jylla lane ka kit jingmut ar syrtap ka ba kdew ban Jied kyrtong ki ban Lamkhmat ha ka imlang sahlang sha ka dorbar thaw aiñ; Kliar-iktiar (Commission) ka mut ka iktiar ka ba ha kliar duh ban korbar ia ka kam ban jied kyrtong sha ka Dorbar Thawaiñ Ka Ri ne Jylla.  Kumta Kliar-iktiar ka lah ban long ia ka shlem ba ha khlieh duh na ka bynta ka kam jied kyrtong lane ka lah ruh ban long ia ki riewtbit ba bat kum ki kher rangbah (senior official) ha kata ka kam jied kyrtong sha dorbar thawaiñ.

Chief Electoral Officer: Kher-rangbah Kliar-iktiar Jied-lamkhmat; la shna kyntien kumne tang ban pyniapher na u CEC ka Ri India.

Election- Jied-lamkhmat

Bye-election- Jied-lamkhmat-biang

Candidate- Kyrtong

Politics- Saiñpyrthei

Political Party- Seng Saiñpyrthei.

Party in Power- Seng ïohbor-synshar

Democracy- Synshar-paidbah

Manifesto- Dulir-juban-tyrwa, ka mut ka dulir ba la sei la ka Juban na ka bynta ban tei ia ka imlang sahlang lyngba ka synshar khadar da ki kyrtong ne ki seng saiñpyrthei.

Adult Franchise: Rangïaw Ïohborjied

Electoral Roll- Ka Bui-nongbud Jied-lamkhmat

Vote- Atiar-bud, ka mut ka atiar ba la buhti da ka sorkar ia ki paidbah na ka bynta ban bud ia ki kyrtong.

Voter- Nongbud

Poll- Budjied, ka mut ka ba jied ban bud ia ki kyrtong ba aireng ha ka kam Jied-lamkhmat.

Polling Station: Semtrei ne Basa Budjied – ka mut ka sem ne ka basa ba trei kam na ka bynta ban korbar ia ka ba bud ban jied la u kyrtong ba mon ki riew shimet.

Polling Officer- Kher Budjied

Polling Agent- Nongmihpli Budjied

Polling Booth- Kop Budjied, ka dei ka kynja kop ba lah ban rung tang marwei briew na ka bynta ban bud ia ki kyrtong. Ka iapher na ka kob ka ba mut ba aireng pyrshah.

Ballot- Kotbud, ka mut ka lyngkhot kot ban bud kyrtong. Lah ruh ban jer Kotbud-rieh (Secret Ballot)

EVM (Electronic Voting Machine)- Kor-atiar-bud, ka mut ka atiar ban bud lyngba ka ba khñiot ha u budam jong ka kor. Ka ktien Budam (button) ka la kylla ka ktien Khasi ba biang ban pyndonkam ha ka thoh ka tar.

NOTA (None Of The Above)- Tait-bud ne Tait-jied, ka mut ba khlem jied iano iano da ka ba kyntait ban jied ne bud.

VVPAT (Voter Verifiable Paper Audit Trail)- Kor-kot Sabut Nongbud, ka mut ka kor ka ba pynmih ka lyngkhot kot kum ka sabut da ka jingthoh ha ki nongbud.

Canvassing- Khrat-paid, ka mut ba khrat ia ki paidbah na ka bynta ban myntoi ia lade ne ia ka seng lajong.

Campaign- Khring-paid, ka mut ba khring ia ki paidbah na ka bynta ban myntoi ia lade ne ia ka seng lajong.

Procession- Ïaidpaidbah

Exit-poll- Lait-bud-jied, ka mut ba mar ia lait ynda la dep na ka ba bud ki nongbud na ka bynta ban jied ia ki kyrtong. Hynrei ka jingmut ba shisha jong kane ka ktien ka dei ba kheiñ antad ia ka jingbun jong ki kotbud (ballot paper) jong ki kyrtong kum ban tynjuh ia ka jingjop ha ka jied-kyrtong. Kumta lah ruh ban jer Tynjuh-bud-jied (Exit-poll) ka ba mut ba tynjuh ia ka jingkheiñ jong ki nongbud.

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet