Shillong, Jymmang 28: Mynta ka sngi ka seng KSU kala leit ban ai jingiarap ia ka Nazareth Hospital Shillong da ki kor Oxygen Concentrator bad ki PPEs ryngkat ka pisa ban ia snoh kti lang ha kane ka jingiakhun pyrshah ia ka khlam COVID-19 ha kane ka jylla ia kaba la ialam da u president ka seng u samla Lambokstarwell Marngar, ia kum kane ka jingiarap la ai ruh sha ka Dr.H.Gordon Robert Hospital Shillong.
Kane ka jingbteng ka KSU ban synńiang jingiarap sha ki Hospital ka long kum shi bynta ban iarap da ka bor mynsiem bad ban iarap tynrong lem ia ka jingkit jong ki hospital namar ka jingshah ktah jur ha kane ka Khlam Covid-19.
Ka Khasi Students Unions’ ka kitbok kitwriang ia ki para Ri ba kin ioh kloi ia ka met ba koit ba khiah bad lyngba ki Doctor,ki nurse bad ki nongtrei jong ki hospital kiba la aiti met bad mynsiem ban pynbit pynbiang bad iarap ia ki Nongpang. Kan long ka jingkyrkhu lyngba ka mynsiem riewshlur jong ki wat ha kane ka jingeh bad jingshem shitom ba ki ia kynduh.
