Shillong, Naiwieng 09: U MLA ka Phulbari u S.G Ematur Mominin, uba dei ruh u chairman ka Meghalaya Forest Corporation Limited, ula kular ha ka jingialang ki nonghikai deficit ka Garo Hills ba un rah ia ki jingeh jong ki nonghikai deficit sha ka sorkar jylla bad ha u myntri rangbah u Conrad Sangma.
Ia kane u la kren kum u kongsan ha ka jingialang kut snem ba 29 ka Garo Hills Deficit School Teachers and Employees Association (GHDTEA) kaba long mynga ha JN Hr Sec School Phulbari, West Garo hills District.
Haba kren ha kane ka jingialang u Mominin u la ong ba kam nonghikai ka dei kaba donburom bad la burom ruh da ka imlang sahlang, ka sorkar ka dei ban pynurlong ia ki jingdonkam jong ki nonghikai.
Shwa ia kane u president ka KJDSTA u Babu Kular Khongjirem haba kren ha kane ka jingialang kum u symbud kongsan u la pynpaw ia ka jingsngew bynniaw ia ka jingbym pat pyllait ioh ia ka tulop ka bynta balai.
“Ka long ka jinglehrain ba watla ka ophis u Director of School Education and Literary (DSEL) ka la pyllait sha baroh ki DSEO ia ka tulop ka bynta balai ne 3rd quarter jong u bnai Nailur haduh Naiwieng 2019 hynrei ka Treasury bad ki bank kim pat ioh pdiang ia ka pisa namar bym don pisa ka sorkar”, la ong u Babu Kular.
U la ong ba ka long kaba sngew lyngngoh kumno ka sorkar ka mang pisa ia ka tulop ki nonghikai khlem don pisa.
U la ban jur ba kane ka sorkar MDA kaba sngew khia ia ka jingbit jingbiang ka pule puthi ha ka jylla, khamtam ia ki nonghikai deficit ba kan pyntreikam ia ka jingai jingmut ka 5th Pay Commission ban siew tulop ia ki nonghikai nalor ka baibam tymmen, ban pynkiew ia ka DCRG sha ka T. 10 lak kaba iaryngkat bad ki shakri sorkar, ban pyntreikam ia ka ACPS, bad ban pynlait noh ia ka bynta kaba ar ne ka 2nd installment tulop shwa ka aiom Khrimas 2019.
Ha kajuh ka por, u bah ED Nongsiang, u president ka Retired Deficit School Teachers u la pynkynmaw ia ka sorkar jylla ban nym klet ban ai ia ki jingmyntoi ba dei hok jong ki nonghikai deficit ba la shong thait. La ioh ruh ia ka jingkren na u Fahen Sangma u general secretary ka GHDSTEA.
