Shillong, Risaw 10: Ki nongialam jong ka Hynniewtrep Youth Council (HYC) mynta ka sngi kila leit ban ia kynduh ia u Superintendent ki pulit jong ka nongbah Shillong u Bah Stephan Rynjah halor ka jingiashoh u dkhot ka seng ha NEHU mynnin myn miet.
U bah Enlang Sawian General Secretary jong ka HYC Shillong City, haba kren ha ki lad pathai khubor ha dien ka jingiakynduh ia u SP City u bah Stephan Rynjah, u la iathuh ba kane ka jingiawan ia kynduh ka long ban dawa na ka tnad pulit ba ka dei ban kem mardor ia ki riew sniew kiba leit ba ktah kti ia u dkhot ka seng ha NEHU.
Haba ia dei bad ka jingujor ejahar la iathuh ba la dep ban ai mynnin myn miet hapoh Mawlai police Station. Na ka liang jong ka HYC ka ong ba ha ka jingshisha lada don kano kano ka jingeh ki tei ki riew sniew ki dei ban wan ia kynduh mar khmat ban ia kren ym ban thom da ka bor.
U bah Enlang nongialam jong ka HYC u la ong ba lada kum kine ki jingjia kin dang jia ia ki nongkit kam jong ka seng na ka liang jong ka HYC ruh kan nym shong kli kti, ka jingwan ia kynduh ia u SP City mynta ka sngi ka long ban kyntu ia ki bor pulit ban kem mardor ia ki nongleh kam sniew.
La iathuh ba kine ki riew sniew kiba don kumba shiphew ngut kila wan ha kamra number 18 jong ka Kupli hostel bad haba kila rung kila wad beit ki dkhot jong ka HYC bad ha kane ka por kila sei da ki narrot bad bom ia u dkhot ka seng, hynrei ha ka jingiakhun u la lait na ka jingmynsaw, ha ka por ba ki phet na kamra kila bom ruh ia uwei u samla pule ba dei na Assam, la ong u bah Enlang.
Ha kane ka jingiakynduh na ka liang jong u Bah Stephan Rynjah SP City u la kular ia ki nongialam jong ka seng ba na ka liang jong ki pulit kin dang thew ia kine ki nongleh kam sniew ban kem ia ki katkum ki kyndon jong ka ain. Ha kane ka jingleit ia kynduh la don lang ruh u President ka seng kmie u bah Robertjune Kharjahrin bad kiwei ki dkhot ka seng.
