Shillong, Nailar 30: Ka Hynniewtrep Youths’ Council Shella Area Unit ha ka 30 tarik mynta u bnai ka lah pynlong ia ka prokram ” Tur Shaphrang Award-2021″ ban Pynkupburom ia ki Khynnah Samla pule ka Shnong Shella kiba lah pass ha ka 1st Division ha ka eksamin matrik mynta u snem na ka Skul RKM Secondary School, Disong, Shella.
Ha kane ka prokram ka Seng ka lah ioh ban ai sngewbha da ka Song pisa kaba long 6000 tyngka marwei bad ka Mementoes ia ki 7 ngut ki khynnah Samla kynthei kiba lah wan shakhmat ha kane ka eksamin matrik kaba dang shu dep.
La ai sngewbha ruh ia kine ki khun Samla kynthei da ka Jain Kyrshah mar shi sem kum ka dak ka jingkyntu kynpham bad ban pynkynmaw ia ki ba kum ki Samla haba ki hap ban moh na la ka Shnong ka thaw bad ka Ing ka sem ba kin leit sha kawei pat ka jaka ba kin bteng ia ki jingpule ki jong ki ha ki kyrdan kiba kham shajrong ba kin kynmaw ban da ia la ka akor ka burom bad ba kin in tip briew tip Blei la ki don hangno hangno ruh.
Ha kane ka sngi la pynshngain jong ka Unit da ki Nongialam ka Seng kmie naduh u General Secretary ka CEC Samla Roy Kupar Synrem, Assistant G.S Samla Isaac Basaiawmoit, Organising Secretary Samla Francis G. Mawlong, ki Rangbah ka Kher Sohlap bad ka Shnong Shella, ki Kmie ki kpa bad ki Nonghikai na ki skul kiba don ha poh Shnong.
La pyniaid ia ka Prokram da u Samla Francis G. Mawlong bad ioh jingkren pdiang na u President ka Unit u Samla Aibok Swett. La ioh jingkren lyngkot na u Secretary Kher Sohlap bad u Rangbah R.L. Roy kiba lah sneng, kyntu bad kyrkhu kyrdoh ia ki khun Samla kiba lah shah Pynkupburom ha kane ka sngi.
Ia ka bynta kum u Kongsan ha kane ka Prokram lah shim da u Nongialam ka Seng Kmie u Samla Rangbah Roy Kupar Synrem uba long ruh u Nongshong Shnong ka Shnong Shella. Na ka liang une u Nongialam nyngkong eh u lah pynpaw ia ka jingkmen bad sngew sarong ba kum ka Shnong bad ki skul kiba don hapoh jong ka.
Kat nang mih ki snem ka lah nang pynmih ia ki khun Samla kiba kham stad bad kham pass bha ha ka eksamin matrik. Ka jingiaroh bad ka burom ka leit sha baroh ki khun Samla, ki kmie ki kpa bad ki Nonghikai kiba lah trei shitom ban wanrah ia kane ka nam ka burom ia ka Shnong ka thaw hi baroh kawei.
U Bah Roy Kupar Synrem u lah kyntu ruh ia ki khun Samla ba kidei ban kut jingmut ba kin pule minot bad trei shitom ba kin lah ban poi ha ki kyrdan kiba kham hajrong ym tang ban shu hun ha ka kam barit baria.
Kum ka Jaidbynriew ngi donkam palat ia ki khun Samla ba kin trei shitom ban poi sha ki kyrdan kum ki IAS, IPS, IES bad kiwei kiwei khnang ba ha ki Tnat Sorkar bapher bapher ha ka Jylla ka jong ngi yn don da ki briew lajong ym kumba ka long mynta ba ngi duna palat.
Kaba donkam ia ngi kum ka Jaidbynriew ka long ba ngi dei ban don ka thong ba ngin lah ban Synshar ialade da lade da kaba ngi don ha ki kyrdan bapher bapher kaba ngi lah ban tei bad ban iarap ban kyntiew ia la ka Jaidbynriew. Ngi kwah ban iohi ba lehse ha ki snem kiban sawan. La ong u bah Seiborlang Diengdoh general secretary ka HYC Shella Unit.
