Shillong, Naitung 14: Ka jingshah ktah jong ki paidbah ha ka jingshlei um ha West Garo Hills ha ki ar tylli ki Block ka Selsella bad Demdema C&RD Block kala long kumba 110000 lak ngut kane ka long katkum ka jingpyntip jong u Ram Singh Deputy Commissioner jong ka West Garo Hills District.
Ki shnong kiba la shah ktah baroh ki don 140 tylli, na ka liang jong ki bor jong ka District Administration kala pyndon kam ia ki SDRF na ka bynta ban iarap ban pynlait ia ki briew kiba la sahkut ha kane ka jingshlei um ban rah ia ki sha ki jaka ba kham shong shnyngian da ka jingiatreilang ryngat bad ki bor jong ka District.
Kane ka jingwan ka umsaw ka dei na ka jingtuid na ka wah Brahmaputra bad kala ktah ia ki bynta ban madan jong ka Garo Hills. Na ka liang jong ka ophis kan sa sam ia ki marbam mardih sha ki paidbah katkum ki kyndon kiba la buh da ka sorkar.
Haduh mynta la buh shiphew tylli ki jaka sah na ka bynta kito kiba shah ktah ha kane ka jingshlei um, la iathuh ba ki don ki jaka ai jingsumar jong ka sorkar, ki skul bad kiwei kiwei jaka hikai kila ngam hapoh um.
