Shillong, Naitung 02: Kumno ai Mining Lease katkum ka The Meghalaya Minor Minerals Concession Rules, 2016 ha jaka ki riew shimet ngi hap shai ba uba ai Lease u dei u trai jaka.bad uba shim lease u dei u ba shu wai ia ka jaka. Kumba long ki local taxi ngi shim ia ka permit taxi ym ia ka taxi lease namar ngi donkam ia ka permit ban kamai, ha ka juh ka por ngi pdiang ia ki ain ban pynneh mei-ram-ew, hynrei ym dei ban pyngnewthuh bakla da ka ain ba ngin shim Mining Lease – ladei ban ong ha katei ka ain ba ngin shim Mining Permit. Shuh shuh lashai lada mih kano kano ka jingiaknieh lane ka huri hura kan katkum katei ka ain ka kdew ba kan dei ka jaka sorkar namar ka kyntien “lease”.
Ka jingniew kaba shyrkhieh da ka Sorkar India ia ngi ki jaidbynriew riewlum kat haduh ia ka Rai Dobar Resolution ka Meghalaya Assembly da ki 60 ngut ki MLA kiba long ka sur jong ka Jylla Meghalaya naduh u snem 2015 haduh kine ki sngi 1 July 2019 ym i patiaw ka Sorkar India bad la donkam ia ka Sorkar Jylla Meghalaya ban shong shah thngan noh hakhmat ka Parliament Ri India ha ryngkat ki 60 ngut ki MLA, MDC, MP, bad ngi kloi ban ia wer ia baroh ki Syiem, Lyngdoh, Sirdar, Wahadar, Doloi, bad Nokma halor kane ka phang kum shibynta ban iada ia ka jinglong kaba shai halor ka jinglong trai halor ka khyndew ka shiap bad ki mar poh khyndew.
Shisha ka jingkylli ka mih mynta kat shaba phai ka Sixth Schedule -(ong u Bah HS Shylla, CEM barim ba ka long kum ka top kaba pei) ka khlaw la wan ka The Forest Conservation Act 1980, ki parmaw la wan lynshop ka the Coal Mines (Nationalisation) Act 1973; ka The Mines and Minerals (Development and Regulation) Act 1957, phai sha ka jinglong trai ka khyndew hap iaid da ka Indian Registration Act 1908 bad bun kiwei kiwei, da kaei ngin iada ia lade mynta haba wat ia ka Resolution Assembly ka Sorkar India kam patiaw.
Kaba sngewkhiah ka long ha ka jingwad bylla kiba bun ki trai jaka ki la ia leit apply katkum katei ka ain. To da pyrkhat aiu kan jia lashai lashi sngi. Ka la dei ka kam jong ki nongmihkhmat baroh ki MLA, MDC, ki MP ban pule bniah ia ki Ain baroh ha shuwa ban pyntur ia ki paidbah sha katei ka rukom batai katei ka Ain.
Katei baroh ka sahkut namar ba donkam ia ka PARLIAMENT ban pynkylla The Coal Mines (Nationalisation) Act 1973; ka The Mines and Minerals (Development and Regulation) Act 1957 khnang ban ioh pynbeit thymmai ia ka The Meghalaya Minor Minerals Concession Rules, 2016. Ngi kyntu ia baroh ki seng sainpyrthei, ki sengbhalang, ban ia pyrkhat lem ia kane ka bynta ka thma lyngba ki Ain kiba ktah ia ka hok long trai jong ngi.la ong u Bah Joh F Kharshiing.
