Shillong, Naitung 09: U Myntri Rangbah ka jylla u Conrad K Sangma mynta ka sngi u la iathuh ba ka sorkar kala shim ia ka rai ba kan dain kuna T.500/- tyngka, lada khlem deng mask ha ki jaka paidbah, lada biah pathar ha ki jaka paidbah bad la da khlem pyniajngai iwei na iwei kaba la tip kum ka “Social Distancing”.
Haba kren ha ki lat pathai khubor mynta ka sngi, la ong ba ka dei ka jingshisha ba kala don ka jingkiew ha ka jingdon kiba shitom COVID-19 ha ka jylla, hynrei ki paidbah kim dei ban syier namar kine kiba la test COVID-19 Positive ki don ha ki jaka ba kam don ka jingiakhleh bad ki paidbah.
U la ong ba kala don ka jingkiew ha ki shipai BSF, hynrei ka don ka jingiatreilang ha pdeng ka sorkar bad ki bor shipai BSF ha kaba la lah ban iada namar kine ki shnong shijaka bad kiwei pat ki dei kiba wan phai na kiwei ki jylla ha kaba ki hap ban bud ia ki kyndon baroh kiba la buh da ka sorkar.
Kaba sngewsih ka long ia kito kiba leit ban ia shim bynta ha ka jingiathoh shong kurim sha Greenwood resort ha Assam, haba ia dei bad kane ka sorkar kan dang ioh ia ka kaiphot mynta ka miet bad ha dien kata ka sorkar kan sa lah ba ong ka jingpynshitom kaba kumno kan shim ia kine kiba pynkhein ia ki kyndon jong ka sorkar.
U Myntri Rangbah u la ong ruh ba ka sorkar kam banse ban shim ia ki rai kiba kham tyngeh namar ba ha bun ki jaka ki paidbah kim bud ia kaei kaba ka sorkar kala bthah, ban pynbeit ia kane ka sorkar kam ban se ban shim ia ka rai ban dain kuna ia kiba pynkhein ia ka ain.
La ong ba kin don saw tylli ki kyndon, kaba ka sorkar kam ban se ban leh ia kaba ka sorkar kam kwah hynrei na ka bynta ka koit ka khiah jong ki paidbah hap ban leh, kata ka long ban dain kuna T.500/- tyngka lada biah pathar ha ki jaka paidbah, ban iaid sha ki jaka paidbah khlem deng mask, bad bym bud ia ka jingpynia jngai iwei na iwei kaba la tip kum ka Sicial Distancing.
