Shillong, Kyllalyngkot 11: Ki shipai BSF kiba la ap pahara bha ha khappud bad ka Bangladesh mynta ka sngi kila ioh bat ia ki nongkhaii kiba mut phah mar beain sha Bangladesh na East Jaintia Hills District.
Ki nongkhaii beain ha ba kila iohi ba ki shipai BSF kila khang kdong ia ki kila bret ia ki mar ki matta ba ki kit bad phet krad ban lait na kti ki shipai BSF, haba ki shipai BSF kila kurup bad haba la loit ia ki song la shem ba ki dei ki jingtah pynbha briew ki kynthei.
Kine ki jingtah pynbha briew kiba la ioh ban kurup kila kot shaka T.4.30 lak tyngka bad ia kine ki tiar la ioh ban kurup na runong jong ka shnong Hangaria, na ka liang jong ki BSF kila aiti ia kine ki sha ki Custom ban leh ia kaba don kam.
Ki jingtah pynbha briew kiba la ioh ban kurup da ki BSF katba dang thmu ban phah sha Bangladesh ha u snem 2022 kala kot sha ka T.1.12 klur tyngka, kane ka long katkum a jingbuh jingkhein ki shipai BSF.
