Shillong, Nohprah 21: Ka “Dimchrang Festival 2018” kaba la long ha Ampati jong ka South West Garo Hills District kala kut noh ha ka sngi palei hapdeng ka jingshong kun, ia kane ka tamasa la pynlong da ki bor jong ka District Administration ha ka jingiatreilang bad ka Ampati Art and Culture Society.
Ha kane ka tamsa kaba ar sngi kaba la pynlong ha Ampati kala don ka jingpyninam ia la ki jong ki riam tynrai jong ka District ha kaba ki samla pule na ki kolej kila wan ban ia shim bynta. Ha ka jingkren jong u Deputy Commissioner u Ramkumar u la pynpaw ia ka jingsngew kmen ka jong u bun bah kila wan ban ia shim bynta wat ha ka por kaba lyngkot la pyntip ia ki. Kane ka tamasa kan dang pynkiew shuh shuh ia ka District baroh kawei.
Ha kane ka tamsa kaba ar sngi kila don bun ki jingialehkai, ki jingiakop thoh easy, ka jingiakop pyni khunlung, bad ha ka juh ka por bun bah ki seng bhalang ruh kila wan ban ia shim bynta ha kane ka tamasa kaba ar sngi. Kaba la khring eh ia ki paidbah ha kane ka tamasa ka dei ka jingpud jingtem na ki kaitor na Rilum Garo.
Ha kane ka tamasa la don bun bah ki ophis sorkar kiba la wan ban ia shim bynta ban pynipaidbah ia ki skhim kiba ka sorkar ka don bynta ki paidbah na baroh lai tylli ki block kiba hap hapoh jong ka District.
