Shillong, Naiwieng 07: Ka jingshna ia ka Super Market ha Iew Sohra kala sdang biang bad bun na ki paidbah ki kwah ban iohi ba kane ka iew kan dep noh khnang ba ki paidbah kin ioh ban pyndon kam noh.
Katkum ki jingtip kiba la iohi la iathuh ba ka jingpyntrei ia kane ka iew kala sdang biang mynta, ha dien ba ka sorkar kala pynlait ban sdang ia ki jingtrei ki paidbah ki angnud ban iohi ba kane ka jingtrei kan dep noh na ka bynta ka jingmyntoi ki nongshong iew.
Katei ka iew ka dei jong ka Hima Sohra bad ia ka iew la pyntrei da ka sorkar jylla kane ka jingtei kaba mynta ka dei ka bynta kaba nyngkong bad ka jinglut na ka bynta kane kan poi kumba saw klur ei ei.
Ka jingsah teng kane ka jingtrei ka long namar kane ka khlam COVID-19 ha kine ki ar snem duna bad mynta ka jingtrei kala sdang biang ha dien ba kane ka khlam COVID-19 ha ka jylla kala duna.
