Shillong, Kyllalyngkot 29: Da ka jingthrang ba ka sorkar kmie kan ai beit beit ia ka song pisa jingiarap sha ki Autonomous District Council, u MLA ka BJP na 19 South Shillong Constituency u Bah Sanbor Shullai u la leit sha Delhi ban ia kynduh ia u myntri ka sorkar kmie uba dei peit ia ka DoNER u Dr. Sukanta Mazumdar
Kane ka jingleit ban ia kynduh jong u Bah Sanbor Shullai ia u Dr. Sukanta Mazumdar ka long ban kyntu ne ban pynbor ia ka jingiarap beit beit ia ki District Council bad u la kyrpad ruh ba dei ban ai jingiarap pisa sha ki.
U Bah Shullai u la ioh ruh ia ka jingiakren kaba jylliew jingmut shaphang ki projek bapher bapher kiba dang sahteng hapoh ka jylla bad ha kajuh ka por u la kyrpad ruh ba dei ban pyllait ia ki scholarship ha ka por kaba biang jong ki samla pule.
U Bah Sanbor u la pyntip ba u Myntri Sorkar Pdeng un wan sha Meghalaya ynda la kut ka elekshon District Council bad u myntri ka sorkar pdeng un sa ïakynduh ïa ki nongïalam ka district council ban weng ïa kino kino ki jingeh bad ki jingdawa kiba dei hok.