Shillong, Kyllalyngkot 30: Mynta ka sngi East Jiantia National Council (EJNC) kala leit ban ia kynduh ia u myntri ka tnad pule puthi jong ka sorkar jylla u bah Lahkmen Rymbui ha kaba ki la ai ia ka jingthoh ha u ban kylli hato ia ka Residential School bad ia ka Teacher Training Centre ha Byndihati la dep ne em.
Ka seng kala ong ba ka sorkar kala don ka jingthmu ban shna ia ka Residential School ha Byndihati kaba hap hapoh jong ka East Jiantia Hills District. Na ka liang jong ka seng kala pynpaw ba kane ka skul ka long kaba don kam na ka bynta ki paidbah ka tei ka thain ban phah skul ia ki khun. Na ka liang jong ka seng kala kwah ban tip hato u kontrator u la aiti ne em ia kane ka iing skul sha ka sorkar.
Haba ia dei bad ka Teacher Training Centre kaba don ha Byndihati, la ong ba kane ruh ka dei kawei ka bynta ba kongsan ban kyntiew ia ka pule puthi ha ka thain, na ka liang jong ka seng ka pdiang sngewbha ia kum kane ka jaka ban ai jinghikai ia ki nonghikai.
Katkum ka jingtip jong ka seng kane ka jaka ai jinghikai ia ki nonghikai haduh mynta kam shym la trei kam bad kane ka bad lada jia ba ka don ka jingjot jingpei ki iing ki sem kiba la dep ban shan mano ban shim ia ka jingbah khlieh. Na ka liang jong ka seng ka kwah ba ka sorkar kan pyntrei kam noh ia kane ka jaka ai jinghikai ia ki nonghikai.
U bah Sambormi Lyngdoh President bad u bah nangjan Dkhar Secretary haba kren ha ki lat pathai khubor u la ong ba namar ba u mytnri ym don ha Shillong na ka liang jong ka seng kila ai ia kane ka jingthoh hapoh jong u myntri ka tnad pule puthi ka jylla.
