Shillong, Nailar 3: U Nongialam ka liang pyrshah u Dr. Mukul Sangma mynta ka sngi u la kylli ia u myntri rangbah ka jylla u Conrad K Sangma shaei kito ki Ambulance ALS kiba la kular ban thied ym pat iohi haduh mynta.
U Nongialam ka liang pyrshah u la ong ba kaei kaba u myntri rangbah u kren ha ki lat pathai khubor ka dei ka jingkular sha u paidbah jong ka jylla, ka jingkylli ka long shaei kito ki Ambulance ALS kuba la kular.
U Dr Mukul u la ong ba bun kiba khlad na kane ka jingpang COVID-19 ki khlad shuwa ban poi sha Hospital, ka daw ka long ba la kit ia kiba shitom da ki Ambulance paidbah, kumba ka long mynta ka sorkar kala pyndem ia lade ha kane ka jingiakhuh pyrshah ia kane ka khlam COVID-19 la kynnoh.
U Dr Mukul u la ong ba ka jingdon kiba pang COVID-19 ki kham bun ban ia kiba ka sorkar ka pynbna man ka sngi bad kumba ka long kane ka jingpang kala pur sha ki nongkyndong bad mynta ym lah shuh ban tip haei don kiba pang.
Kumba ka long mynta kam shym la don ka jingbthah ia kaba biang ia ki nongtrei ka tnad ka koit ka khiah ba kin batai ia ki paidbah ha ka por ba ki leit ban ai Tika, u la ong ba bun sien kine ki nongleit ai Tika kim shym ioh ia ka jingbatai kaba biang ban pynshai sha kiba wan ai Tika kan long kumno ynda la ai Tika.
Kaba sngewsih eh ka long ba wat la ia kane ka jingpang la dep ban pynbna kum ka jingpang kaba la ktah ia ka ri baroh kaweim hynrei ka jingeh ka long ba ka sorkar kam shym la buh ia ka pisa bad ki ophisar ha ki District ban thung ia ki nongtrei kumba ka long mynta ka don ka jingduna briew ha ka kam ban ia khun pyrshah ia ka kane ka khlam COVID-19.
Ka sorkar ka dei ban pynshai paidbah ha ka rukom kaba biang ban weng ia kane ka jingeh kaba ki paidbah kim da sngew tynnad ban ai Tika, ka sorkar ka dei ban wat ia ka daw balei ka jia kumne ba ki briew kim wan sha khmat ban ai Tika.
