Shillong, Nailur 8: Ka All Meghalaya ContractorS bad Suppliers Association ka la iakynduh ia u Myntri ka Tnad Labour U Bah Sanbor Shullai ha ka sngi saitjian 07-08-2021 ban iakren halor ka Employee’s Provident Fund Organisation bad kumjuh ha kaba iadei bad ka Meghalaya Labour Law ( ammendment) Act 2020.
Na ka liang jong ka AMCSA kala pynsngew sha u myntri ba na ka liang ka EPFO ka pyrshang ban leit ban rung sha ki tnad pyntrei bapher bapher jong ka Sorkar Jylla ban pynbor ia ki Contractor ba kin pynrung kyrteng ia ki Nongbylla bad ka Employee’s Provident Fund.
Na ka liang ka Association ha ka jingiakynduh bad u Myntri ka la pynshai ba ka EPFO act 1952 kadei ka Ain kyrpang na ka bynta ki Company, Ki Factory, Ki Firms baheh kiba don ia ki nongtrei permanent staff kiba ioh tulop bnai bad kumjuh ruh kiba don ka jingtrei kumba baroh shisnem.
Katba ha kaba iadei bad ki Contractor jong ka jylla bun kim shym long kiba tikna ban ioh kam bad kumjuh ruh ki nongbylla kim long kiba tikna haba ki nongbylla ki trei na uwei u Kontrak sha uwei pat.
Dei na kane ka daw ka Ministry of Labour ha u snem 1996 ka lah hukum ia ki Sorkar jylla ban thaw ia ki Welfare Board na ka bynta ki Nongbylla sngi ha kaba yn kynthup ia ki Nongbylla sngi ha ka Building And Other Construction Workers ( REgulation of Employment and Conditions of Service) Act, 1996 bad ia ki jingmyntoi baroh ia ki nongbylla lah kynthup ha kane ka Ain.
Ha kajuh ka por ka AMCSA ka kyntu ruh ia u Myntri ba ha ka 21 tarik u bnai lber 2016 kat kum ka shithi No.LC/BCWWC-25/2011/Pt-1/1828-1837 I Commissioner ha kato ka por ka IAS Smt. M.N Nampui ka lah phah ia ka circular sha baroh ki tnad pyntrei bapher bapher ba kin phah ia ki Kontraktor jong ki ban register ia ki Nongbylla ha ka MBOCW welfare board khnang ban lah ban iarap ia ki nongbylla kiba shem iaka lanot ha kano kano ka por.
Te kumjuh ka AMCSA ka kyrpad ia I Myntri ka tnad Labour ba in phah recirculate biang ia kato ka Order khnang ba kan pynsuk ia ki Kontrak bad kumjuh ruh kan long ka jingmyntoi na ka bynta ki nongbylla sngi.
Ha kaba iadei pat bad ka Meghalaya Labour Law ( Ammendment) Act 2020 ka kynhun ki Kontrak ka kyrpad ia I Myntri ba kat kum ka notification ba la ioh na ka Tnad labour ha ka 26-04-2021 ha kaba ki Kontraktor kim donkam ban leh ia ka Labour License kat bym pat ioh work order bad lada ka jingtrei jong ki kam kot ia ki nongbylla 50 ngut shaneng ha ki kam ba ki trei.
Hynrei na ka liang ki tnad Labour pat ki Issue ia ki Labour license kaba long kumba pynkhein hi ia ka Ain kaba lah dep pynbeit.te kumta na liang ka Kontrak Association ka kyrpad ia u Myntri ba in peit bniah ha kaba iadei bad kine ki phang baroh ar bad ban bthah ia Ka Labour Office ba kan nym pat ai ia ki Labour license kat bym pat ioh ki work orders.
Kane ka long kat kum ka kyrwoh na u bah Emanuel Syiem Malngiang Asst. General Secretary ka All Meghalaya Contractor’s & Suppliers’ Association.
