Shillong, Nailar 07: Ka Hynniewtrep Achik National Movement (HANM) Western Ri-bhoi District mynta ka sngi ka 7 tarik u Nailar 2024 kala leit ban aiti daka dorkhas sha u Symbud Myntri Rangbah ka Jylla u Bah Prestone Tynsong ban tuklar halor 3 tylli ki mat.
Kane ka long naka bynta ka bha ka miat ki nong shong shnong ka thain. Ha kane ka jingwan ban ia kynduh ia u symbud Myntri rangbah la wan ban ia synranglang da ki nongialm shnong Belahari bad ki dkhot jong ka seng.
Haba kren sha ki lad pathai khubor, u President ka HANM Western Ri-bhoi samla Sumar Lyngdoh ula iathuh kawei na kine ki mat ka dei ka jingdawa buh noh sa kawei ka Police Outpost hapoh ka shnong Balakhawa kaba don ha khappud bad ka Jylla Assam.
U la ong ruh ba ka jingdonkam ban buh iaka Police Outpost ha kane ka shnong ka dei naka bynta ban peitngor ia ka shongsuk shong shngaiñ ki paidbah nongshong shnong ha khappud ka jylla Meghalaya bad Assam.
Ka HANM haka jingsynran lang ki nongshnong shnong Belahari, kala pynkynmaw ruh ia ka jingdonkam ban ioh noh ia kasurok ba paka ha ka shnong Belahari namar ka dei ka shnong ha khappud.
Nalor kane ka HANM kala dawa ruh na u Symbud Myntri Rangbah ban buh noh ia ka Fire and Emergency Service ha Patharkhmah namar ka long kaba donkam bha ban iada ia ki jingjia pluh ding bapher bapher hapoh ka thaiñ Ri Bhoi Sepngi.
