Shillong, Iaiong 10: Ka Khasi Students’ Union hapoh ka jingialam u Samla Lambokstarwell Marngar, President; Samla Biangbor L Paliar, Vice President; Samla Reuben Najiar, AGS bad kiwei kiwei ha ka step u 10 tarik u Iaiong, 2025 ka la ioh ban kynduh ia I Dr. Ricky A. J Syngkon, MP jong ka Lok Sabha na Shillong Constituency ban buh ia ka dorkhas halor ka ishu NEIGRIHMS.
Ha ka shithi ka Seng ka la pynpaw ki jingleh bor na ka liang u Director jong ka NEIGRIMHS ba thmu ban iuhroit bad leh shiliang ia ka hok jong ka jaitbynriew.
Na ka liang jong ka Seng ka la kynduh ia u Director ha 1 tarik u Iaiong halor bun tylli ki mat jingdawa bad ban pynbeit ia ki jingkynrum kynram, hynrei na ka liang u Director um I shimkhia halor kane ka bynta bad u pynslem khnang ia ka por ba ka tarik ba khatduh na bynta kane ka kam kan kut noh.
Ki mat kiba kyrkieh kiba ka Seng ka dawa ban pynbeit mardor shuwa ban iaid shakhmat kane ka thungkam ki long ka rta ban lah ban apply, Ka Seng ka la pynsngew ba ka rta ba khatduh ba lah ban apply ia ka kam ha NEIGRIHMS ka long 35 snem ha ki jingiathung kam kiba mynshuwa hynrei mynta ka la pynrit kynsan sha ka 30 snem.
Kane kan buh jingeh shibun ia kiba la khmih lynti ban thep kam hangne nalor ba ki post ba lait ki mih shisien lano khamtam ba la duh katto katne snem na bynta ka khlam Covid ha kaba ym shim don kano kano ka jingthung kam.
Ratio 20:80 na bynta ki shynrang bad Kynthei na bynta ka kam Nurse- Ia kane baroh ki hospital kiba dei peit hapoh ka Sorkar India ki bud ia kane hynrei ka NEIGRIHMS kam shim leh kumta. Ha u snem 2023 da ki spah ngut ki nurse shynrang ki ioh kam bad tang katto katne ngut ki kynthei ki ioh.
Kine ki shynrang ki wan lut na Rajasthan bad ka Seng ka suba jur ba don jingiadei eiei bad u Director ba ki wanrah lut ia kine ki briew na shathie. Kine ki nurse kim shim dei kiba tbit bad kumta ka buh jingma ia ki nongshah sumar bad shibun tylli ki jingujor la ioh halor kane ka bynta.
Ka jingtbit na ki hospital ba don 50 tylli tam ki jingthiah- Na bynta ki GNM nurse, ka NEIGRIHMS ka buh kane ka kyndon bad kane kan pynduh nong bha ia ki nurse ki jong ngi kiba trei ha PHC/CHC namar ym nym pdiang ia ki.
Ban pynlong eksamin offline- Ha kane ka eksamin ba ladep, ka NEIGRIHMS ka pynlong eksam online bad bun ki samla ki ioh jaka ban leh eksamin shabar bad kane ka khanglad ia ki samla khamtam ia kito kiba wan na ka longiing kaba duk. Bad ki computer centre ha jylla ruh ki duna bad yn ym lah ban pynlong eksam ia baroh shisien leh kumta ka Seng ka dawa ban pynlong eksamin offline.
Ka jingduna palat ka reservation na bynta ki ST- Ka Seng ka dawa ba dei ban pynthymmai ia ka reservation na bynta ki ST. Kadon ruh ka jingthmu na ka liang u Director ba nangne shakhmat ka eksamin thungkam kan pyniaid noh na Delhi. Ka Seng ka dawa ba nym dei ban ailad ban leh kumta namar kan wanrah ia ka jingduhnong bakhraw ia ki trai jylla.
Ka Seng ka pynsngew sha u bah Ricky A J Syngkon ba kine kiei kiei baroh ki long kiba suk ban pynurlong lada u Director u mon ban pynbha ia ka NEIGRIHMS hynrei kaba sngewsih ka long ba um kwah ban pynbha hynrei ban pynjot ia ka NEIGRIHMS bad um don jingkitkhlieh ia ka bha ka miat jong ki nongshah sumar hangto.
Ka Seng ka ialeh ban pynbeit ia kine Ki jingkynrum kynram da kaba iakren bad iathir hynrei lada u Director u sngap kuman kumba u leh, na ka liang ka Seng ka nym don lad hynrei hap ban mih madan.
Na ka liang u Dr. Ricky A.J Syngkonui la kular ban tuklar halor kane ka kam bad ban pynurlong ia ki mat jingdawa jong ka Seng bad shen hi in ialeh ban khot ia u Director ka NEIGRIHMS ha ryngkat bad jingiadon ryngkat ka Seng bad pynbeit ia kine ki jingkynrum kynram.
