Shillong, Jymmang 15: Ki nongialam Nongtluh Mathan Marmaiñ Development Furom ki la la leit ban iakynduh ia u myntri ba dei peit ia ki C&RD Block ban dawa Block ba thymmai kaba hap ha Ri Bhoi District.
Ha kane ka jingleit ban iakynduh ia u AT Mondal u ba dei peit ia ki C&RD Block la ialam da u Chairman Raid Nongtluh, Raid Mathan, Rain Marmain Furom u bah Arnold Syngkli ha ka jingdon ryngkat u Doloi ka Syiem Raid, Lyngdoh. U Doloi Bongthai Raid bad kiwei kiwei.
Ha ka dorkhas ba la aiti ha u AT Mondal, ka Forum la pynpaw ia ka jingdonkam ban ioh Block ba thymmai namar ka jingroi stet katei ka thaiñ bad na ka bynta ka jingbit jingbiang jong ka dong ka thaiñ kaba don palat 70 tylli ki shnong la donkam ban ai noh da ka Umden C&RD Block.
Kane kan kynthup ym duna ia ka 110 tylli ki shnong ki ban sa pynkylla noh na ka Umling C&RD Block kaba la don lypa. La pynpaw ba ka jingthmu jong ka Furom ba pynlong ban dawa Block thymmai ka long ban wanrah ia ka jingsynshar ka ba kham jan bad ki briew jong ka thaiñ,
La pynpaw ruh ia ka jingeh ki nongshong shnong ka thaiñ namar bun ki shnong ki la jngai ban poi shaduh ka ophis C&RD Block kaba don mynta ha Umling, ka long kaba eh bad kaba pynjynjar ia ki Headman, ki SHG’S bad kiwei kiwei ki seng ban poi sha ka head quarter jong ka Block.
kumba ka long mynta ka Umling C&RD Block ka dei kawei na ki Block ba la heh tam ha Ri Bhoi District kaba don kumba 223 tylli ki shnong ki ba la donkam ban pyniakhlad noh ar bynta. na ka bynta ka jingmyntoi jong ki paidbah.
