Shillong, Jymmang 03: Ka jingpyntrei kam ia ka ‘Containment Measure’ ha kane ka nongbah Shillong kala poi sha ka sngi kaba lai mynta ka sngi, kumba ka long ki briew kila sngap ia ka jingkyntu jong ka sorkar ha kaba ki dukan marban kiba bun ha Iewduh ki khang bad duna ki briew kiba iaid ba ieng ha kane ka nongbah Shillong baroh kawei.
Ban peit ba kan nym don ka jingialum paidbah ha ki dukan ki dielang kiba dei ha ki bynta jong ka iew kiba hap hapoh ka jingpeit ka Hima Mylliem na ka liang jong ki pulit syiem ka hima kila iaid pahara kylleng kaiew ban pynthikna ba kiba shong dukan kin but ia ki kyndon ka sorkar.
Ha kane ka sngi kaba lai ba ka sorkar kala pyntrei kam ia ka ‘Containment Measure’ la iohi ba ka sor Shillong kala kynjah ha kaba kiba iaid ba ieng dei tang kito kiba leit sha ki ophis bad kum juh ki nongbylla, hynrei ki paidbah ban shi ia mih kai kala duna shibun eh.
Ki nongdei mada ruh kiba die ia ki mar bam kum ki jhur ki dohkha, ka don ki duna namar ka Shillong Muncipal kala ai ia ki da ka number ba kin shong katba ia kiwei kiwei ki bym die ia ki mar bam la khang ba kin shong die jingdie, ki dukan ha ki shnong ki thaw ruh ki duna ka jingialum briew.
