Shillong, Jylliew 28: Ka seng JSU ka pynrem jur halor ka jingong u Myntri Rangbah ba um don kti ban tuklar ban pynioh Environmental Clearance iaka Star Cement hynrei na ka liang ka seng kam pdiang ia kane ka jingbuh rieh.
Ka seng JSU ka kam ba kat kum ka shithi 22 tarik u Rymphang ba lah phah da ka MoEF&CC sha ka Meghalaya State Pollution Control Board lah don ka bynta jong ka shithi ba lah ong ba u Myntri Rangbah ka jylla u lah phah ar sien iaka shithi kata haka 26/07/2020 bad haka 10/02/2021.
Kine ki ar tylli ki shithi ki kren ban kyrpad na ka MoEF&CC ban pyndonkam noh daka para 7 clause (v) stage 3 jong ka EIA,2006.ban pynduh noh iaka public hearing lane ka jingpynsngew paidbah halor ka project ka Star cement bad yn shim da jingthoh bad jingsoi ki nongkyrshan bad nongpyrshah iaka project bad ban phah shaka MoEF&CC.
Ka seng ka pynrem jur iaka jingleh u Mytri Rangbah ka jylla bad kam pdiang da lei lei iaka jingleh shimet ka jong u bad u lah phah jingthoh sha ka tnat MoEF&CC jong ka sorkar India bad kane ka jingleh jong u CM ka pyn i shai ba kam don ka jingiatip lem lane ka jingiarai lang bad ki Cabinet Minister namar kum ba paw mynta kidon ki myntri jong ka jylla kiba pyrshah iaka jingioh EC ka Star cement.
Ka seng ka phah ruh iaka kyrwoh sha baroh ki riew ieid mariang bad sha kito kiba pyrshah iaka project ka star cement ban thoh sha ka NGT namar kat kum ka Environment Clearance (EC) ba lah ioh na MoEF&CC ka pynpaw shai ba dang biang ka por ban thoh shaka NGT ban pyrshah bad pyndam iaka EC jong ka Star Cement hapoh ka 30 sngi na ka tarik ba ki lah ioh iaka EC.
Ka seng JSU ka kyntu sha baroh ki paid ka bri u hynñiewtep ba ngi dei ban pyndonkam ia u khulom bad ngi dei ban mih shakhmat ha kum kane ka por namar ka jingshah iuh roit laka hok bad jingshah iuh roit ka sur u paidbah ba bun balang haka jingleh donbor ka sorkar bad ka Star Cement ban iaid lait na ka sur u paidbah.
