Shillong, Nailur 29: Mynta ka sngi ka KSU Jaintia Hills District Unit ha ryngkat ka KSU Jowai Circle ki la hiar 
sha Kiang Nangbah Government College naka bynta ban jurip ia katei ka Jaka pule halor ka jingioh jingtip ba don ka jingpei um ha katei ka College.
Haka jingjurip la lap ba ka don shisha ka jingpei um jong ki kamra klas na ki sad jong katei ka Building. Haka jingshisha iakane ka class room la dep maramot dang kumba hapoh 3 snem eiei hynrei kaba sngewphylla ka long balei tang 3 snem ruh ympat dap bha la iohi ba kiba bun ki bynta ka class room ki la pei um lyngba ki Ceiling bad kiwei kiwei.
“Hakaba iadei bad kane , ngi pynrem jur ia u kontraktor ba trei torti iakane ki karma klass bad shen ngi naka liang ka Seng ngin sa leit ujor ruh sha ka Tnad PWD Building ia kane ka jingtrei torti u kontraktor” la ong u Samla Justice Paul Lyngdoh Education Secy ka KSU Jaintia Hills District Unit.
Hakane ka juh ka sngi ka Seng ka la leit jurip ruh ia ka Laboratory kaba don ha katei ka College hakaba ka seng ka la lap ba katei ka College kam don iaka Laboratory kaba biang naka bynta ban pyndonkam daki khynnah pule ha katei ka College.
Naka liang ka Seng ka la kyntu jur iaka Sorkar ban pynbiang ia baroh ki jingdonkam hakatei ka college khnang ba kan lah ban ai jingshakri kaba paka iaki khynnah pule katei ka jaka pule.
