Shillong, Jymmang 20: Ka Khasi Hills Autonomous District Council, mynta ka sngi kala kynnoh ia ki bor pyniaid district jong ka Ri Bhoi District halor ka jingkhang khyrdep noh ia ka khyrdop khrong khajna jong ka tnad tnad Trade ha Umdihar, Ri Bhoi.
Haba kren sha ki lad pathai khubor u nongai ktien jong ka Executive Committee u Bah Powel Sohkhlet u la ong, ki bor pyniaid District ki niew ia ka KHADC kum ka nongleh beain haba khrong khajna ia ki bar jylla lyngba ka trade.
Katba ia ka jinglum khajna beain, shano jah u Deputy Commissioner ka Ri Bhoi District bad halor ka jingkhang khyrdep jong ka bor pyniaid district ia ka jaka lum khajna ka KHADC ka dap da ka jingsngewkhia namar ba kim shym la phah jingpyntip lane notis.
Na ka liang u Bah Winston Tony Lyngdoh uba dei u Executive Member u la ong ba ka Council ka khlem leh beain namar ba kila ai da ka work order bad la ioh ruh ia ka No Objection Certificate na ka shnong bad ia ka copy la ai lang sha u SP bad DC ruh.
Shuh shuh u Bah Winston u la iathuh ba ka jingkhrong khajna kala sdang ha ka 15 tarik u bnai Jymmang bad kiba khrong khajna ruh ki khlem khrong beain namar ba ki ai da ka resit.
Halor ka jingshah khang khyrdep ka jaka khrong khajna, u Bah Winston u la iathuh ba haduh mynta ki dang ap ia ka jingthoh na ki bor pyniaid District jong ka ri Bhoi District.
Nalor kane,u Bah Winston ula pynpaw ba um lah satia ban pynshai la ka KHADC kala thoh ne em sha ka Ministry of Home Affairs (MHA) ban pan jingbit ha kaban buh khyrdop bad bynrap “Hynrei ngi la buh ia baroh ki kyndon kat kum ka ain. Ki khyrdop lum khajna jong ka KHADC ki dei kiba la don la bun bun snem”.
Shuh shuh u Bah Winston u la iathuh ba ka KHADC kam shym la khot tender, hynrei kala shu khot da ka internal application da kaba wah ha ki notice board jong ka KHADC.
