Shillong, Risaw 09: U bah Himalaya Shangpliang nongai ktien ka seng Congress mynta ka sngi u la ong ba wat ha dien ba u nongialam ka liang pyrshah u Dr Mukul Sangma u la phah da ka shithi sha u myntri rangbah ka jylla u Conrad K Sangma ban ong ba sangeh kane ka jingpynkynriah kam pathar ia ki ophisar hynrei kane ka sorkar kam shym la sngap.
Haba kren ha ki lad pathai khubor mynta ka sngi ha MLA Hostel Hall, u bah Hima u la ong ba, ka long kaei kaei kaba sngewsih ban tip ba u ADC jong ka Jowai, u Bah Shemi Laloo u la shah tim shah tla ha u wei u para jong u minister bad ha ka juh ka sngi la pynkynriah kam ia u na Jowai sha Ampati.
La ong ba ka jingpynkynriah kam ha Jaintia Hills kam dei tang ia ki ophisar hynrei wat ia ki nonghikai bad ia ki peon ruh la pynkynriah na Jaintia Hills sha kiwei ki District, kane ka jingleh jong ka sorkar ka long kaba yn nym lah ban pdiang. Kane ka jingleh kan ktah ia ki ophisar bad kaba eh ka long ba ioh ki ophisar kim treh shuh ban trei.
U bah Himalaya u la ong ba bun wat ki IAS ophisar ruh kila ia leit sha Delhi, ha ka por jong ka sorkar Congress kim juh leh ha kane ka rukom ha kaba pynkynriah kam ia ki ophisar. Kane ka jingleh jong ka sorkar kaei kaban ktah kan long ia ki paidbah jong ka jylla.
U bah Himalaya,ha ka jingiadon lang u Bah George B Lyngdoh, u la ong ba ka sorkar ka dei ban sangeh ia kane ka jingleh ban pynkynriah kam ia ki nongtrei sorkar katba mon. ka jingpynkynriah kam ia u ADC na Jowai sha Ampati la kynnoh ba ka dei namar ba u tei u ophisar um treh ban kohnguh ia kaei kaba la bethah ia u ban leh.
Haba la kylli u ei u ta u para jong u minister bad u ei uta u minister na ka liangjong u Bah Himalaya um shym la treh ban iathuh ia ka ka kyrteng bad u la ong ban tip kylli na u ADC un iathuh ia ka kyrteng jong kita ki briew.
