Kyntu ka FKS ia u Conrad ban khang ia ki nongwan jngohkai pyrthei ban rung sha Jylla

Shillong, Lber 17: U bah John F Kharshiing lamphang ka  Grand Council of Chiefs of Meghalaya bad nongai buid jong ka Federation of Khasi States, kala phah da ka jingthoh sha u myntri rangbah ka jylla u Conrad K Sangma, ha kaba u la ong ba ka sorkar ka dei ban khang shuwa ia ka jingwan ki nongwan jngohkai pyrthei sha jylla ban iada na ka u COVID-19.

Ha ka shithi kaba la phah la ong ba kane ka long ka jingai jingmut ban iada na ka jingpur u khniang  COVID-19 hapoh jylla Meghalaya. Kum ka FKS  ka pynpaw ia ka jingsngewnguh ia ka rai jong ka Sorkar jylla ban khang ia ki skul  ki jaka pyni baiskop, ki jaka jngi.

Ha ka juh ka por ka FKS ka sngew ba ka dang donkam kam shuh shuh ki jingiada kiba dei ban shim kyrkieh kum shibynta ban iada ia ki paidbah ka jylla Meghalaya, namar kane ka long kum ka thma kaba jar jar kaba la pur sted baroh kawei ka pyrthei.

Ka FKS ka don ban ai jingmut sha u myntri rangbah ka jylla  ban ia da na ka jingpur jong u khniang jingpang COVID-19  ka long ba ka sorkar ka dei ban tohkit bniah kyrkieh ka jingdon ka jingbiang ki mar bam mar dih khamtam ki dawai dashin hapoh ka jylla na ka bynta ki bnai ban wan.

Ban khang noh syndon shipor ia ka jingwanrung ki tourist bad ki nongleit nongwan na ka bynta 30 sngi bad ban pynjari da ka ain ban peitbniah ia kiba rung ba mih bad  sa bishar biang  hadien 30 sngi .

Ban pynjari da ka por ia ka korphiew ha ki National Highways jong ka jylla ha ki por janmiet khnang ban ioh bishar bniah ia kiba rung bad khamtam ia kiba iaid lyngba ka jylla Meghalaya kum kiba wan na Silchar lane na Guwahati bad kiwei kiwei ki jaka rung sha ka jylla. Ban pyntreikam ia ki jaka peit bniah da ki briew jong ka tnad ka koit ka khiah ha ki jaka rung bad jaka mih ha ka jylla.

Ban bthah ban kyntu ia ki Districts, ki BDOs, Syiem, Lyngdoh, Sirdar, Dolloi, Nokma, Rangbah Shnong, Sordar Shnong, Myntri Shnong ba kin ai jingtip sha baroh ki nongshong shnong ba kin tip shaphang kumno ban iada ia lade na kum kane ka jingpang kaba ym pat lap dawai khamtam ia ki kyndon jong ka WHO.

Ki dak ban ithuh ia une u jingpang, kaei ban leh bad kaei ka bymdei ban leh, iano ban phone haba donkam ban wad jingtip, hangno ki jaka test, ki mobile number jong ki test center kum shibynta ban pynlong ia baroh ki paidbah ka jylla kiba peitngor ia kum kane ka jingpang namar bun ki paidbah kim juh pule kotkhubor.

Ban thaw kyrkieh ia ki lad ki lynti ban buh ia ki jaka  test ia ki paidbah, ban synriet ki dawai iada ia baroh ki mar ki mata ki kali kiba rung sha poh ka jylla. u Myntri Rangbah  bad u mytnri ka koit ka khiah kin pynbna shisien ar sngi ia ki jingpynkhreh bad ki jingkyrmen kaba ka Sorkar ka la pynkhreh halor ki lad jingiada ba la buh ka sorkar kum shi bynta ban ai jingkyrmen ia u paidbah ka jylla ha kum kane ka por.

Ban pynkhreh ban sdang bishar bniah ia ki kyndon bala buh da ka tnad iada mariang jong ka sorkar pdeng. Ban kyrpad ia baroh ki nongshong shnong ki nongsynshar naduh ki Kur, ki Shnong, Raid ki Hima,  ki paidbah ki nongialam niam ki nonghikai ha ki shnong ki seng bhalang bapher bapher ban sangeh shwa shipor ki program ban kiar ia ka jingialum paidbah kum shibynta ban iada ia lade.

Ban bishar bniah ia ka jingplie ki  way side DHABA’s kiba don ha shilynter ka Highway ha kaba juh sangeh ki kali kiba bun kiba wan na sha bar. Na ka liang jong u Bah John F Kharshiing u kyrmen ba ka sorkar kan pdiang ia kane ka jingai jingmut jong ka FKS ban iada ia u paidbah na utei u khniang jingpang uba shyrkhei uba ka WHO bad ki Ri ka pyrthei baroh kawei ki dang ia leh shitom ban wad ia u dawai uban pynsangeh ia utei u khniang COVID-19.

 

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet