Shillong, Rymphang 06: Ka kynhun “Federation of Persons With Disabilities” dang shen kala leit ban ia kynduh ia u myntri rangbah ka jylla u Cornad K Sangma ha iing sah jong u bad ha kane ka jingiakynduh kila kyntu ia u myntri rangbah ka jylla ban pyntrei kam ia ka bhah mang kam ba 4% ia kiba don jingduna ha ki dkhot met.
Ha ka jingthoh kaba kila ai sha u myntri rangbah kila kdew shai ba ka jingmang kam na katei ka 4%, ka dei ban long, 1% na ka bynta kito kiba duna ka bor iohi,1% na ka bynta kito kiba duna ka bor iohsngew,1% ia kito kiba shem shitom ha ka iaid ka ieng bad 1% ia kito kiba don ka jingduna ha ka bor sngewthuh.
Ka seng kala kyntu ia u myntri rangbah ka jylla ban pyntrei kam ia kane ka bhah kam kaba 4% katkum ka ain “Right of Persons with Disabilities, Act’ 2016 jong ka sorkar pdeng bad katkum ka jingpynbna jong u Lat ka jylla.
Ha ka jingthoh kaba la ai sha u myntri rangbah kila kyntu ruh ban peit na ka bynta ban thung ia u wei na ki dkhot napdeng kiba don jingduna ha ki dkhot met kum ki dkhot jong ka MPSC lane hapoh jong ki DSCs.
Ka kyntu ia ka sorkar haba ka pynmih ia ki jingpynbna lait kam ka dei ban da kdew ia kino ki jaitkam na ka bynta kiba don ka jingduna ha ki dkhot met. La iathuh ha khmat jong u myntri rangbah ba ia mynta ki don 16 ngut kiba trei kum ki muster roll bad ka sorkar kiba don jingduna ha ki dkhot met.
Ka seng ka kyntu ruh ia u mytnri rangbah ka jylla ba un shim khia ban ia kren bad ki kompeni ba kin pdiang ia ki ha ka kam jong ki, kum ka seng ka kyntu ia ka sorkar ba kan sangp lem ia kane ka jingpynsngew ka jong ki, ka ong u bah Ferdinand L Marshiliang Chairman ka FPWDs.
