Shillong, Jymmang 13: U general secretary jong ka kynhun Ka Sur u Paidbah kabri Hynniewtrep u bah Egenstar Kurkalang u la iathuh ba kum ka seng kala dep ban phah da ka jingthoh sha u myntri rangbah ka jylla u Conrad K Sangma ban shim ia ka rai ban suamr ei ia kiba pang COVID-19 na ka MHIS.
Haba kren ki lat paithai khubor mynta ka sngi, u tei u nongialam ka KSUP u la ong ba kum ka seng kala phah da ka jingthoh sha ka sorkar ba kan ai jingsumar ei ia kiba ioh ia kane ka jingpang lyngba ka kard MHIS.
U bah Kuraklang u la ong ba ki pynpaw ia ka jingsngewnguh ia ka sorkar kumba la kren da u bah Prestone Tynsong symbut myntri rangbah ka jylla ba la pynrung ia ka jingpang COVID-19 hapoh ka MHIS, hynrei ka ei kaba ka seng ka kwah ka long ba ka sorkar kan sumar ei ia kiba pang COVID-19 lyngba kane ka kard MHIS.
Ha ka juh ka por ka KSUP, ka kyntu ba ka sorkar ka dei ban wat lat wat lynti na ka bynta ki nongniah Taxi bad kiba bylla ieng briew ban iarap ia ki namar bun ki trai kim shah ban wan trei sha ki iing bad ki kali lei khlem kamai shuh.
Ka long ka jingeh ia ka sorkar bad kum juh ia ki paidbah, wat ha pdeng kane ka jingeh ka sorkar jylla ka dei ban wat ki lat ki lynti ia ki nongrep kumno ba kin ioh ban die ia ki marrep jong ki namar ka jingkhang dam ia ka iew dielang ha Iewduh kala buh ai ki nongrep ha ka jingeh kaba khraw.
U bah Thomas Passah u la kynnoh ba ka sorar kala bakla ha kaba ia dei bad ka jingiada na kane ka jingpang COVID-19, namar kumba ka long mynta ka paw ba ka sorkar kam shym la long kaba la pynkhreh ban ia khun pyrshah ia kane ka jingpang.
Kala long kaba don kam ba ka sorkar kan khot ia kren ia baroh 60 ngut ki MLA ban ia mir jingmut namar kumba ka long mynta ka dei namar ka jinglaitlan ha kine ki bor kiba la dep ha ki jaka rung kum ha Umling bad ka jylla ka sa mat haduh katne ia ka jingeh, kane ka dei ka jingphah beit sha ki iing ki sem bad u to u ba leit sha iing hato u bud ne em ia kita ki kyndon kiba la buh da ka sorkar.
