Shilong, Naiwieng 11: Ka seng North East Network ka pynrem ia u Vikash Gupta u ba la shah kynnoh ba u la batbor ia ka samla kaba dang 18 snem, ka seng ka ong ba u tei u nongleh kam sniew u dei u Ward Commissioner jong ka Cantonment, u dei ruh u trai jong ka Aptech Aviation bad u ba pyniaid ia ka Assembly Hotel ha kane ka nongbah Shillong.
Na ka liang jong ka NEW ka ong ba kane ka dei ka jingjia kaba shai bha ba ki briew kiba don ha ka bor ki juh thombor ia ki kynthei kiba wan na ki iing ki sem kiba duna, kum kine ki jingjia ym juh kham mih koit ban ujor bad kum kane ka jingthombor ka iai beteng da ki brie wkiba don ha ka bor ha kane ka jylla Meghalaya.
Ha kane ka jingjia u tei u ba la shah kynnoh u dang pyrkhat ba kane ka kynthei kan nym iathuh ha kaba ia dei bad kane ka jingia bad kaei kaba la pynlyngoh shuh shuh ka long ba une u briew u la phah ia ka dur ba la shah hapoh thnad ha sardar police station kaba u la shon hi.
Na ka liang jong ka NEW ka ai ka jingkyrshan ia kane ka kynthei bad ia ka iing ka sem kiba la shim ia kane ka rai ban ujor sha ki bor jong ka ain, mynta hap ban ia peit hato ka ain kan trei kam ne em ha kane ka jylla, ka jylla kaba sngew sarong ban ong ba ki kynthei ki shngain ha kane ka jylla.
Na ka liang jong ka NEW ka kyntu ia ki bor jong ka ain, ka iing bishar bad ia baroh ki bor sorkar ba ki dei ban leh ei ei pyrshah ia u tei u ba la shah kynnoh ban pynioh ia ka hok jong ki kynthei bad khynnah khnang ba ki briew kin ioh ia ka jingshaniah ha ki bor jong ka ain, la ong Joy Syiem Director jong ka North East Network – Meghalaya ha ka kyrwoh kaba la phah mynta ka sngi.
