Shillong, Nohprah 17: Ka Shillong City Youth Wing ka kyntu ïa ki paidbah jong ka Jylla Meghalaya ba kin nym biej bad shah pynngop ha kane ka scheme FOCUS bad FOCUS+ jong ka NPP bad kata ka scheme 1000 na ka bynta ki long kmie jong ka TMC.
Ka Youth Wing jong ka UDP ka ngeit skhem ba ki paidbah ka Jylla ki dei kiba lah shai bad kiba sngewthuh kham bha ïa ki jingshisha bad ruh ban bishar ba shaei kine ki jait schemes ki jah ha ki 4 snem kiba lah leit hynrei ki mih syndet syndet mynta tang 2 bnai shwa ka election.
Kum ka Youth Wing, ka buh ka jingkylli, hato ki paidbah ki donkam jingïarap tang shwa ka por election, Ka jingwan jong ki heh nongïalam jong ki seng kiba na bar ka Jylla lane kiba baroh ki tip kum ka National Party ha kane ka Jylla tang ha ka por election ruh ka pyni ba ki ithuh ïa ka Jylla jong ngi tang ha kine ki por.
Ka Youth Wign jong ka party UDP ka ngeit ba ki paidbah kin nym patiaw than ïa kane ka jingwan pynbiej jong kine ki nongïalam kiba na ri Thor, kane ka long katkum ka kyrwoh kaba la phah da u bah Desmond K L Mawlong General Secretary Shillong City Youth Wing.
