Mairang, Kyllalyngkot 20: U District Election Officer jong ka Eastern West Khasi Hills District u pyntip paidbah ba hadien ba ka Election Commission jong ka Ri India ka la pynbna iaka elekshon sha ka iing Dorbar Thaw Ain ka jylla Meghalaya bad namar ba ka Model Code of Conduct ka la treikam, yn pyntreikam mardor ia ki kyndon jong ki ain kum ka R.P Act 1951, ka IPC bad ruh kino kino ki rai ne jingbthah jong ka Supreme Court bad ki High Court kumjuh.
Kumta, la kyntu ia baroh ki paidbah nongthep vote jong ka Mairang bad Mawthadraishan Constituency ba kin kiar na ka kano kano ka jingshim bad ai pisa, kano kano ka jingshah pynthame, ka jingshah pynbiej ban ym thep vote, ka byrngem byrsit, ka jingthep vote da ka jingsngew niam ne sngew thain bad ruh ka jingpynshlur ia kino kino ki kam kiba pyniashrut bad wanrah jingkulmar.
Lada don kano kano ka jingpynkhein iaka Model Code of Conduct kum ka jingpynpra ia ki jaka paidbah ne mar paidbah, kano kano ka jingsam pisa ne kiad, kino kino ki jingai sngewbha ne jingtyrwa pisa da ki kyrtong ne ki seng sain pyrthei, kano kano ka jingbyrngem ia ki paidbah nongthep vote, ki paidbah ki lah ban ujor sha ka Complaint Monitoring Cell ia kaba la buh ban shim ia kino kino ki jingujor kiba iadei bad ka kam elekshon bad kane ka Cell kan treikam baroh arphew saw kynta.
Ki number phone ki long, Control Room — +919233270162, Returning Officer 30 – Mairang (ST) A/C — 09774876609, Returning Officer 31 – Mawthadraishan (ST) A/C – 07005170039, District Election Officer—09436310004. La buh ruh ia ki flying squad ban pynshisha bad ruh ban rejistar mukotduma ia kino kino ki nongpynkhein ia ki kyndon ba la buh.
