New Delhi, Nailar 16: U Myntri Sorkar Pdeng ba dei khmih ia ka tnat Pule Puthi bad Skill Development u Dharmendra Pradhan u la kyntu ia ki briew jong ka ri ba kin iashim bynta ha ka khanasamari na ka bynta ka National Curriculum Framework ban wanrah ia ki jingai jinghikai ba thymmai.
Ka National Curriculum Framework kaba iahap bad ka NEP 2020 kan don ka bynta kaba khraw ban pynurlong ia ka thong Viksit Bharat, u la bynrap.
U la ong ruh ba ka jingsaindur ia ka National Curriculum Framework kaba bha, kaba kyllakatkum ka jingdonkam bad kaba pdiang lang ia baroh ka long kaba donkam ban pyniasoh ia ka jingbat ia ka jinglong tynrai bad ka jingpeit ia ki jingdonkam katkum ka pyrthei mynta, ka jingpyllait ia ka kam ai jinghikai na ka rukom pyrkhat ha ka por ba dang shah synshar ha ki mynder bad ka jingwanrah ia ka jingsngew sarong shuh shuh ha ki pateng ban wan.
Ka tnat pule puthi ka la khot sngewbha ia ki jingai jingmut na ki briew lyngba ka khanasamari lyngba ka bor internet ban saindur ia ka National Curriculum Framework bad hadien kane ban saindur ia ka syllabus, ki kot pule bad kiwei kiwei ki tiar ba pyndonkam ban ai jinghikai.
Ka Sorkar India ka la pynbna shaphang ka National Education Policy (NEP), 2020 ha ka 29 tarik u Naitung 2020, kaba ai jingmut ia ka jingpynbha ia ka kam ai jinghikai lyngba ka jingsaindur ia ka National Curriculum Framework (NCF).
Ia ka kam ba iadei bad ka National Curriculum Framework la sdang ha ka jingiamir jingmut lang bad ki District Consultation Committee, ki State Focus Group, ka State Steering Committee, ki National Focus Group bad ka National Steering Committee ha ryngkat kiwei kiwei.
La wanrah ia ka rynsan teknoloji – website bad mobile app na ka bynta ka jingpyntreikam mar mar khlem da pyndonkam ia ki kot. Da kaba peit shuwa na tynrai, ki jylla bad ki UT ki la pynlong ia ki jingiamir jingmut ha ki distrik, ki khanasamari lyngba ka mobile app.
Ka jingiamir jingmut ha ki jylla lyngba ki State Focus Group bad State Steering Committee ban iakren bad kito kiba donkti ha kane ka kam kum ki kmie ki kpa, ki nongtrei Anganwadi, ki nonghikai, ki nongai jinghikai ia ki nonghikai.
Ki khynnah pule bad kiwei kiwei ban lum ia ki jingsngew bad ki jingai jingmut shaphang ka lawei jong ka kam ai jinghikai ha ki skul, ka jingsumar bad jingai jinghikai ia ki khynnah khyllung, ka jingai jinghikai ia ki nonghikai bad ka jingai jinghikai ia kiba la rangbah.
Ha kaba iadei bad baroh kawei ka ri ruh, la iakren bad ki National Focus Group bad National Steering Committee ban ia puson halor ki bynta bad ki jingeh bapher bapher kiba kynthup ia ka jingiakren bad ki tnat Sorkar bapher bapher.
Ki kynhun shimet, ki kynhun trei mon sngewbha, ki kompani, ki kynhun ai jingiarap bad kiwei kiwei ban lum ia ka jingtip na ka bynta ka jingsaindur ia ka NCF. La don ka jingthohna ka bynta ka jingsaindur ia ka NCF ban ialam lynti ia kito kiba don bynta ha kane ka kam.
Ka jingplié lad ia baroh kiba iadon bynta ha kane ka kam, ki ba lah ban long ki bym dei ki kmie ki kpa, ne ki nonghikai ne ki khynnah pule kiba kwah ban iadon bynta ha ka jingpynkylla ia ka rukom ai jinghikai ha India, ba kin ai jingmut halor ki bynta kiba iadei bad ka kam ai jingpule, ka long kaba donkam bha mynta. Kine ki jingai jingmut bapher bapher kin plié lad ia ka jingpyntreikam ia ka kam NEP 2020 khlem kanokano ka jingthut.
Baroh kiba iadon bynta kiba kynthup ia ki nonghikai, ki principal, headmaster, ki nongialam ha ki skul, ki nongai jinghikai, ki kmie ki kpa, ki khynnah pule, ki dkhot ka imlang sahlang, ki kynhun trei monn sngewbha, ki riewshemphang.
Ki nongmihkhmat, ki nongsaindur, ki nongrep bad manomano kiba don jingmut halor ka jingai jinghikai ha ki skul bad ka jingai jinghikai ia ki nonghikai ki lah ban iashim bynta ha kane ka khanasamari lyngba ka bor internet kaba pynlong ha ki 23 jait ki ktien kiba kynthup ia ki ktien kiba la ithuh hapoh ka VIII Schedule jong ka RitiSynshar jong ka ri.
Iatrei lang bad ngi bad iashim bynta ha kane ka khanasamari bad nohsynniang sha ka jingwanrah ia ka kam ai jinghikai kaba khlain, kaba iaineh bad kaba shai ha India. Shon ha kane ka link ban iashim bynta ha kane ka khanasamari mynta: https://ncfsurvey.ncert.gov.in.
