Shillong, Jymmang 15: U MLA ka Nongpoh Constituency u bah Mayraldborn Syiem, u la pyntip ba ka jingpyntrei ia ka surok na Nongpoh Umden Sonapur ka la iaid shait shait bad u kyrmen ba ia kane ka surok yn lah ban pyndep noh katkum ka por ba la buh.
Haba kren shaki nongthoh khubor, u bah Mayralborn Syiem u la iathuh ba kane ka surok na Nongpoh Umden Sohnapur ka dei kaba jrong 58.600 km kaba la mang ban shna na ka state skim bad na ka Pradhan Mantri Gram Sadak Yojna (PMGSY).
“Na kane 20.00km kata na Nongpoh ha Umden ka dei ka ba la mang ban shna na ka state skim bad 38.600km na Umden Marmain haduh Sonapur ka ba la mang na ka PMGSY skim” u la ong.
U la bynrap ha kaba iadei bad ka surok na Nongpoh ha Umden kaba la mang ban shna na ka state skim, ka jingpyntrei ka la iaid shait shait bad kum u nong mihkhmat u la pyntip ba u la leit ban jurip ia ka ne ka jingpyntrei ia kane ka surok.
U la iathuh ba ha ka jingjurip ha ka jingiadonlang ki rangbah shnong ki ophiser na ka PWD la shem ba ka kam ka la iaid shait shait bad u la pynpaw ka jingai khublei ia ki nongtrei ka PWD ba ki la trei shait shait ia kane ka surok.
“Ha kaba iadei bad ka surok ka ba long 38.600km kaba dei na Umden Marmain sha Sonapur nga kwah ban pyntip ba ia ka work order la dep ban pynlait bad ki contractor ki la dep ban hiar sha kane ka jaka ban jurip ia ki katto katne ki jaka kiba kham don jingeh ban lah ban pynurlong noh ban shna ia kane ka surok” la ong u bah Mayralborn Syiem.
U bah Mayralborn Syiem u la ong ba u kyrmen ba ka jingshna ia kane ka surok yn lah noh ban pyndep katkum ka por kaba la buh ban pyndep.
