Shillong, Rymphang 26: U Bah Renikton L Tongkhar MLA jong ka Mawkyrwat ba dei ruh u myntri sokrar jylla mynta ka sngi u la kyrpad ia ki nongpyniaid ia ka St, Xavier’s ban nym mih na katei ka jaka namar kane ka dei tang ka jingleh jong ki katto katne ki riew sniew.
Kum u MLA jong katei ka jaka u pynrem jur ia kine ki nongleh kam sniew kiba khlem sngewthuh ia ka rai ka par jong ka dong bad ka thain, haba ia dei bad kane un ia kren ia myntri rangbah ka jylla bad la shai ka sngi yn leit ban ia kynduh ia ki paidbah ba pyniaid ia kane ka skul ban kyrpad ia ki ban iaid sha khmat bad ba kin nym mih kumba kila ong.
Na ka liang jong u MLA u kyntu bad ai mynsiem ia ki nongpyniaid ia kane ka college ba kimd ei ban duh mynsiem, ai kin sdang biang ia ka jingtei ia kane ka college namar kane ka jingleh dei tang ki katto katne ki briew ki bym sngewthuh ia ka jingdon kam ka pule puthi.
La iathuh ba ki pulit jong ka South West Khasi Hills District kila bat ia ki katto katne ngut ki briew ban tohkit ha kaba ia dei bad kane ka jingjia, haba ia dei bad kane na ka liang jong u MLA u la ong ba ai ka ain kan leh ia kaba don kam.
