Shillong, Jylliew 09: U National President ka party National People’s Party u Conrad K. Sangma u ba dei ruh u myntri rangbah ka jylla haba kren ha ka jingialang ba shisien shisnem jong ka party u la ong ba ia ka party la pyniar ia ka sha bar ki jylla ka Northeast.
U la pynmynmaw ha ka por leit ban sdang ia ka NPP ha Manipur ha u snem 2016 kiba rung sha ka party ki don tang ar ngut hynrei mynta ha ka elekshon kaba la dep ki ioh 17% ka vote bad mynta ki don 7 ngut ki MLA.
U national president u la ong ba kam don kaba suk ha ka sain pyrthei ka don ka jingkiew bad ka jinghiar kumba long ha ka jingim briew, hynrei mynta haba kyrtiangdien bad peit ia kane ka jingialang kaba shisien shisnem jong ka party, ki nongkit kam ka party kiba la wan na ka jylla Kerala, na Tamil Nadu, na Bihar, na Jharkhan, na West Bengal ia kaba um lah ban mutdur.
U National President u la ong ba ka juh pynkynmaw ia u ha kaba por ba ki sdang ia ka party ha Manipur ba don tang ar ngut kiba pyniasoh sha ka party ha kaba u la diaw shisha, hynrei u kpa jong u, u Purno A. Sangma bam kwai ha dwar u blei u dei u bym juh duh jingkyrmen.
U myntri rangbah ka jylla u la ong ba kane ka jingsdang kaba rit ha ki jylla kiba long Shabar jong ka thian shatei lam mihngi ka Ri India, kumba ka long mynta ka party NPP ka dei kawei na ki National Party kaba dang long thymmai bad kumba ka long mynta bun kiba kwah ban rung sha ka party.
