Shillong, Lber 30: U symbut myntri rangbah ka jylla u Bah Prestone Tynsong u la iathuh ba la dep ban peit bniah 53 ngut ki briew bad baroh kine kiba la dep ban peit bniah kim don ia ka jingpang COVID-19. Haduh mynta ka jylla Meghalaya ka dang lait na kane ka jingpang.
La iathuh ba baroh ki samla pule bad kiba trei sha bar kiba la wan phai sha jylla bad kiba la register ia lade ki don palat ia ka 6000 ngut bad na kine kiba ka tnad ka koit ka khiah hala dep ban bud din ban peitngor ia ki ki long 3000 ngut, ia kitei baroh la bthah ba kin shong khop ha iing katba ym pat kut ka por.
U Symbut myntri rangbah u la ong ba ki paidbah ki lah ban pyntip sha ka tnad ka koit ka khiah lada kito ki briew kiba la bthah ba kin shong khop ha iing lada kim kohnguh, la bthah ia ki dorbar shnong ba kin peit ia kane lada kim kohnguh ka sorkar kam ban se ban rah ia ki bad buh sha ki jaka ba la pynkhreh ka sorkar ba kin sah marwei.
La iathuh ba kiba wan khatduh sha ka jylla ki dei ha ka 25 tarik mynta u bnai, ha dien jong katei kim lah shuh ban wan namar bay m don eroplane shuh ba iaid bad kumjuh ki rel bad ia ki khappud ruh la khang.
U Symbut myntri rangbah u la kyrpad ia ki paidbah nongshong shnong ban duwai lem na ka bynta baroh kiba trei ha kane ka kam ban ia leh pyrshah ia u khniang jingpang Corona Virus ba kin ioh ia ka met kaba koit ba khiah khnang ba kin lah ban trei ban iada ia ka jylla na kane ka khlam.
