La don kam kyrkieh ban wanrah ia ka jingkylla ha ka MRSSA ong ka ComSO ia u Conrad

Shillong, Risaw 23: Ki Nongialam ka CoMSO mynta ka sngi ki lah leit ban ia kynduh ia u Myntri Rangbah ka Jylla  U Conrad K. Sangma ha ka jingiadonlang u Symbud Myntri Rangbah Bah P. Tynsong, ha kamra treikam jong u ha Secreatriat ban buddien ia ka jingdawa ban pynrung ia ki kyndon ka ILP ha ka Amendment jong ka MRSSA kumba lah dawa naduh kaba nyngkong lyngba ki jingiakynduh bad ka Sorkar.

Kum ban shu pynkynmaw ha ka jingiakynduh ba khadduh bad u Myntri Rangbah ha une u bnai ba lahdep,  u lah kular ban pyndep noh ia kane ka kam kham kloi bad ruh un pyndep ia ka jingthmu ban wanrah ia ka Amendment lyngba ki Artylli ki Cabinet Meeting.

Ka Jingiakynduh mynta ka sngi ka long ban pynkynmaw ia u Myntri Rangbah ka Jylla halor ka jingkular ka jong u bad na ka liang jong u u lah kren shai ba ki kam ki lah iaid bha shakhmat bad ha kine ki sngi ban wan ka Sorkar kan sha shong noh ia ka Cabinet Meeting bad yn wanrah noh ia ka Amendment Act jong ka MRSSA ha kaba yn thep ia ki kyndon jong ka ILP ha ka.

Ka Kynhun ka lah pynpaw ruh hakhmat u Myntri Rangbah ba na ki khubor ba lah paw la ioh jingtip ba ka Sorkar Kmie kan wanrah ia ka CAB ha kane ka Jingshong Dorbar ka ban sdang naduh ka 18 tarik u Naiwieng bad kumba lah pynpaw da u President ka BJP bad u Myntri Kam Pohing ka Sorkar Kmie u Amit Shah.

Ka CAB kan don ia ki kyndon ban iada ia ki jylla ba don ia ka ILP bad kumba ka long, kum ka jylla ngi lah donkam kyrkieh ia ka Amendment jong ka MRSSA ha shuwa ba ka Sorkar Kmie kan wanrah ia ka CAB. Kumba ka long mynta ka por ka lah long kyrkieh bad donkam palat ban wanrah noh ia ka ain ILP ha ka jylla.

Na ka liang u Myntri Rangbah u lah kren shai ba u  sa lum noh ia ka Jingialang ki Myntri Sorkar Jylla ha kine ki sngi ban wan bad ka Sorkar Jylla hi ka don ia ka jjngthmu ba skhem ban wanrah ia ka Amendment ha shuwa ka Session ban wan jong ka Parliament.

Na ka liang ka kynhun kan burom ia ka jingkular jong u Myntri Rangbah ka Jylla bad ngeit skhem ruh ba ka Sorkar kan sa leh kloi ban pyndep ia kane ka kam.Na ka liang ka CoMSO kan sa shong pyrkhat ha kine ki sngi halor ki prokram bapher bapher ba kin sa leh lada jia ba ka Sorkar kam pyni ia ki dak ba ka don shisha ia ka jingthmu ban leh ia kane ka jingdawa, ong u Bah Roy Kupar Syemrem secretary CoMSO.