New Delhi, Nailur 02: K
a Tnat Electronics and Information Technology, Sorkar India da kaba pyntreikam ia ka bor jong ka hapoh ka section 69A jong ka Information Technology Act ryngkat ki kyndon jong ka Information Technology (Procedure and Safeguards for Blocking of Access of Information by Public) Rules 2009.
Ha kaba iadei bad ka jinglong ba kyrkieh namar ki jingma lah rai ban khang ia 118 tylli ki app mobile (peit ha ka appendix) namar katkum ka jingtip ba la ioh lah pyndonkam ia kine ki app ha ki kam kiba long pyrshah ia ka jingthmu bad jinglong jong ka India.
Ka Tnat Electronics and Information Technology jong ka Sorkar Pdeng ka la ioh pdiang shibun ki jingujor na ki tyllong bapher bapher ba kynthup ki kaiphod bapher bapher shaphang ka jingpyndonkam bakla ia ki katto katne ki app mobile ba don ha ki rynsan Android bad iOS ban tuh ia ki jingtip shaphang ki briew ba pyndonkam ia kine ki app bad pynpoi ia kine ki jingtip sha ki server kiba don shabar ri khlem da ioh jingbit na kine ki nongpyndonkam.
Ka jingpyndonkam ia kane ka jingtip da katto katne ki briew bad ki kynhun kiba long pyrshah ia ka India ka ktah ia ka ri baroh kawei, kaba long ka bynta kaba sngewkhia kaba donkam kyrkieh ia ki sienjam..
Ka Indian Cyber Crime Coordination Centre, Tnat Kam Pohiing jong ka Sorkar Pdeng ka la phah ruh ia ka jingai jingmut ban khang ia kine ki app kiba pynsniew.. Kumjuh ruh, ki la don ki jingsngewkhia na ka liang ki nongmihkhmat paidbah bapher bapher, kiba don shabar bad hapoh ka iing dorbar thawain Parliament jong ka ri.
Ka la don ka jingkyrpad kaba jur na ki paidbah ban shim ia ki sienjam ba tyngeh pyrshah ia kine App kiba ktah ia ka jinglong bad jingthmu jong ka ri kumjuh ruh ka jinglong shimet jong ki nongshong shnong jong ngi.
Katkum ka nongrim jong kine bad halor ka jingioh pdiang ia ki jingtip ba dang shen ba ka don ka jingpyndonkam bakla ia ki jingtip ba ioh na kine ki App ka la wanrah ka jingsngewkhia ba kine ki App ki ioh bad pynsaphriang jingtip ha ka rukom ka bym dei kaba lah ban ktah ia ka ri baroh kawei.
Na ka bynta ka jingiatylli bad ka jinglong trai ia la ka ri, ka jingiada ia ka India bad ka shongsuk shongsain ha ka ri. Bad ka jingpyndonkam ia ki bor synshar jong ka ri, ka Sorkar India ka lah rai ban khang ka jingpyndonkam ia ki katto katne ki App, ha ki mobile bad ha kiwei kiwei ki tiar ba don internet. Ia kine ki app la jer kyrteng ha ka appendix ba la ai harum.
Kane ka rai kan iada ia ka bha ka miat jong ki klur ki nong India kiba pyndonkam mobile bad internet. Kane ka rai kadei kaba la buh thong ban pynthikna ka jingshngain jong ki kam internet hapoh India.
