Mairang, 26 Nailar: Hadien ba la ioh jingujor halor ka jingpynlong ia ki jingiakob khwai dohkha da katto katne ki nongshongshnong ha ki pung dohkha bapher bapher kiba don hapoh Eastern West Khasi Hills District ha kiba ka bai rung kam duna ia ka 500/- (Sanspah) tyngka shi ryngwiang bad ka khusnam sha ki nongjop ka bym duna ia ka 15,00,000 /- (Khatsan Lak) tyngka.
U District Magistrate ka Eastern West Khasi Hills District, ha ka hukum ba la pynmih ha ka 23 tarik u Nailar, 2022 hapoh ka Section ba 144 jong ka CrPC u la pakhang ia ka jingpynlong ia ki jingiakob khwai dohkha ha kiba ka khusnam sha ki nongjop ka long palat ia ka 1,00,000 /- (Shi Lak) tyngka bad ka bai rung kaba palat ia ka 100/- (Shi Spah) tyngka shi ryngwiang.
Shuhshuh, katkum kane ka hukum, yn ym shah ban pynlong jingiakob khwai dohkha palat ia ka ar sien shi snem ha kajuh ka pung. Ia kane ka hukum la pynmih da u District Magistrate kum shi bynta ban khanglad ia ka jingpyndonkam bakla bad jingsngewthuh bakla ia ka Amusement Act bad ruh ban khanglad ia ka jingshah shim kabu jong ki duk ki suk ki bym da biang tikna ka kamai kajih.
Kino kino kiba pynkhein ia kane ka hukum kin shah pynshitom katkum ka Section ba 188 jong ka Indian Penal Code, 1860, bynrap shuh shuh ka hukum u District Magistrate.
