Shillong, Nailur 22: Ka Deputy Commissioner jong ka South West Khasi Hills District ka kong C Kharkongor kala iathuh ba mar ia ioh jingtip halor ka khubor ba ka don ka jingorpait ki jaka thep ia ki jaboh ba mih na u uranium ha thain Domiasait la phah ia ki pulit mynnin ka sngi ba kin leit tohkit.
“Mynta ka sngi nga la phah ia u Magistrate bad ia u Additional Superintendent ki pulit ba kin leit jurip bha ban tip la ka don shisha ne em kata ka jingorpait jong ki jaka thep ia u Uranium, ia mynta ngam pat lah ban ong ei ei katba ngam pat ioh ia ka kaiphot” la ong ba ka DC kong Kharkongor.
La iathuh ba ki pulit kiba la leit mynnin ka sngi kila leit sha duh jaka ba don ki jaka thep ia jaboh kiba la mih na u Uranium bad katkum ka jingiathuh jong ki la ong ba kam don kata ka jinglait sha bar kata ka um na ki jaka thep ia ki jaboh na u Uranium bad ha katei ka jingleit ki pulit kila ia kynduh ruh ia ki trai jaka kiba la aiwai ia katei ka khyndew.
Na ka liang jong ka DC kala ong ba ka lah ban ong ei ei tang ha dien ba la ioh ia ka kaiphot na u Magistrate ba la leit mynta ka sngi ban leit jurip ban lap ia ka jingshisha halor ka jingmih khubor ba ka don kata ka jingtuid ka um sha bar na ki jaka thep ia ki jaboh Uranium, ia mynta ym pat lah ban ong ei ei katba ym pat ioh ia ka kaiphot.
