Shillong, Nailar 31: Mynta ka sngi ka seng Hynniewtrep Youth Council (HYC) kala plie paidbah ia ka dur mot ba shisynieng u bah Bull N Lyngdoh President ka barim ka seng Khasi Student Union (KSU) bam kwai ha dwar u blei mynta ka sngi ha Mophran ha ka jingiadon lang kiba ha iing ha sem.
Haba kren ha kane ka sngi u bah Roykupar Synrem President ka seng HYC la ong ka jingkylli ka long ha dien jong u Tirot Sing, Kiangnangbah bad bah Bull shaei jah kita ki nongialam jong ka jaidbynriew, balei ka jaidbynriew hynniewtrep kam lah shuh ban pynmih ia kita ki nongialam.
Ha dien jong ki ym shym la lah shuh ban pynmih ia ki nongialam kiba don iala ka nongrim, hynrei pynmih sa ki nongialam shisngi ki phong da kawei ka Umiphom bad shisngi kila phong da kiwei ki umiphom, ha ka kyrteng jong u paidbah, ha ka kyrteng jong u ki nongshong shnong ha kane ka jylla.
La ong ba ymioh shuh ia ki nongialam kiban phah iala ka jong ka jingim na ka bynta ka bha ka miat jng u paidbah, hynrei ngi ioh ia k nongialam kiba pyrkhat kiba myntoi shimet, kane kala dei ka por ba kum ka jaidbynriew sei ia ki nongialam kiba kumno nangne sha khmat.
Ka seng HYC ka ngeit ba ka snam u Tirot Sing, Woh Kiangnangbah bah Bull N Lyngdoh ka dang tid, dang tuid ha ki thied snam, dei na kata dang don ia ka jingkymren ba kum ka jaidbynriew nangne sha khmat kan dang pynmih ia ki riewshlur ki khun dap shynrang kiban ia da ia ka ri bad ka jaidbynriew.
La ong ruh bakum ka seng ha kine ki 10 snem kila mat ia ki jingeh kum ki dkhot bad ki bor jong ka sorkar, dang ha kine ki sngi la iohi katba ka seng ka dang ialeh pyrshah ia ki drok ki dkhot ka seng kila shah khot hajir, ki bor pulti ki don ia ka bor ban khynra ia ki drok, ka seng kam don ia ka bor hynrei ka bor ki ioh na ki paidbah, ka seng kan nymriej ban ia khun pyrshah ia u drok.
Kiwei kiba la kren ha kane ka jingialang ki long, u rangbah snong ka Malki u bah P K Sohtun, ka para kong ka Evanjalin Lyngdoh, u myntri ka hima Mylliem u bah Midnight Kharlukhi, bah Raphael Warjri la kren pdiang burom da u General Secretary u bah Ryhembor Saibon, ia ka jingduwai la leh da u bah Wanlumlang Kharsyiemlih ia ka jingialang la pyniaid da u Vice President Donboklang Kharlyngdoh.
