Shillong, Iaiong 09: La pynhap pyrda noh ia ka School Sport Meet 2025 jong ka Roman Catholic UP & LP Schools SSA Nongbah Mawshuit bad Dewiong ha ka 8 tarik u ïaiong 2025 kaba la sdang naduh ka 31 tarik lber 2025. La pynphuh pynphing ia kane ka jingpynkut ia ka Sports Meet 2025 da ka jingrwai bad jingshad leh Marchpast ki khynnah skul.
Ha kane ka sngi la wan ban long u kongsan da u MDC ka Sohra Constituency u bah Titostarwell Chyne ha ka jingiadonlang u Chairman ka Managing commitee u bah Bishar Khongshei, u rangbah shong ka shnong Nongbah u bah Cliffment Khongshei, u Secretary ka Raid Mawshuit u bah Kyntiew Khongshei bad ki riew rangbah, ki kmie ki kpa ki khynnah skul jong ki artylli ki skul.
La ai jingkren u Chairman ka Managing Committee, u rangbah shnong ka shnong Nongbah bad u Secretary ka raid Mawshuit ki ba la ai ka jingiaroh ia ki nonghikai jong kine ki artylli ki skul ka Roman Catholic UP & LP Schools SSA Nongbah Mawshuit bad Dewiong ki ba la trei shitom ban ai jingnang jingstad ia ki khynnah skul ha ki skul kumjuh ruh ia ka jingtreishitom jongki ban pynlong ia ka School Sport Meet 2025 ha kaba ki khynnah ki ioh ia ka lad ban pynpaw ia ka sap ka phong jongki ha ka liang ka jingialehkai bad kiwei kiwei.
U bah Titostarwell Chyne haba ai jingkren hakatei ka jingialang ba lyngkot u la pynpaw ia ka jingsngewkmen ban iohi ia ka jingla nang kiew katei ka skul na ka por sha ka por, kane baroh ka dei ka jingtreishitom ki nonghikai ba ki la aiti met bad mynsiem ban ai jinghikai kaba bha tam ia ki khynnah.
La ong ba 16 snem mynshuwa ympat ju don koit kum kane ka programme, wat ka madan ba la pynlong Sport ruh ka dang rit bha, ym pat lah ban pynlong jingialehkai kumba long mynta.
Dang don shibun bha ki jingeh khamtam haba iadei ka surok ban poi sha katei ka shnong, ki ingskul ba paka, kine baroh kin urlong tang da ka jingiatreilang ka jingiatreilang ryngkat ki nongmihkhmat ki rangbahshnong ryngkat bad ki nongialam ki skul Managing Committee ki nonghikai bad khamtam ki nongshong shnong.
U bah Titostarwell u la pynpaw ia ka jingangnud ka jong u ban dang iai kyntiew ka pule dangle bad u la pynpaw ka jingsngewkhia ba ki dang don ki shnong bym pat don skul ha katei ka thaiñ kum ka shnong Pdang bad Lynsteng bad u la pynpaw ba un pyrshang iakren ia ki rangbahshnong kitei ki shnong ban seng skul ha ki shnong jongki, namar ba ka sorkar ruh lyngba ka polisi jongka ka kwah ba baroh ki khynnah ka jylla ki dei ban ioh jingnang jingstad.
“Haba ka jingnang jingstad ka don ka pule dangle ka kiew, ka ioh ka kot ruh kan kiew,ka jingduk kan nymlah ban ialeh pyrshah ia ka jingnang ka jingstad bad dei tang ka jingnang jingstad ka ban lah ban kyntiew ia ngi” la pynpaw u bah Titostarwell Chyne.
