Shillong, Kyllalyngkot 19: Kum shibynta ka jingpdiang sngewbha ia u snem thymmai 2025, ka Seng Samla Mission Compound Shillong ka la pynlong ia ka taiew lehkmen kaba la sdang naduh ka 13 tarik haduh 18 tarik u kyllalyngkot, 2025, ha kaba ka seng samla ka la pynlong ia ka lympung jingiakop bapher bapher bad ban pynlong ruh ia ka jingsam khusnam ia ki nongjop
Ha ka sngi ba khatduh ka jinglehkmen la iadonlang da u MLA ka North Shillong u Bah Adelbert Nongrum kum u kongsan, u MDC ka Khasi Hills Autonomous District Council (KHADC) u Bah PN Syiem, kum u symbud kongsan, U Rangbah Shnong bad kiwei kiwei de.
Haba ai jingkren u Bah Adelbert u la pynkynmaw ia ka jinglong ki mynshuwa ba kim treh ban iapeiñ bad ka jingtyrwa ka sorkar Phareng hashuwa ba kan mih na ka jylla bad ban dawa ia ka sorkar ban mih kumba ka wan khlem wanrah kano kano ka jingkylla ha ka riti dustur u Khasi.
U la ong ba ki aiñ ki long kiba donkam hapoh ka District Council, balei donkam ban iakhih tylli lang bad ki nongmihkhmat hapoh Assembly ba kumno ban weng noh iaka para 12(a) kaba pynwut ia ka jingtreikam jong ka District Council, kane ka long na ka daw ka jinglehklet ki na kawei ka term sha kawei ka term.
“Ngi pan kaei kadi kaba ngim don ha kti, ngi klet noh pat kaei kaba ngi la don ha ka kti, kaei kaba ngin pynbha,pynkhlaiñ” u la ong ba kata ka long kaba donkam hapoh District Council, u la ong, ka jaitbynriew jongngi ka tlot, namar ba ngim don ki aiñ, ka aiñ ka long kaba donkam ha ba kum kine ki por.
“Ngi kum ka jaitbynriew watla ngi long tang shitroh, hynrei sngewkmen pat ba ngi don ia ka thong, kata ka dei ba ngin pynskhem ia ka jinglong kawei, ban nym shah ia kawei ban wan ban pharia iaka jaitbynriew ka jongngi” la ong u bah Adelbert Nongrum.