Shillong, Nailar 01: U President jong ka seng HANM u bah Lamphrang Kharbani u la iathuh ba ha dien ba u bah Boby Basaiawmoit u la iehnoh kum u General Secretary ka seng mynta ka sngi hapoh ka jingialang jong ka High Level Committee jong ka seng kala jied ia u Bah Cyprian Skhar kum u general secretary ba thymmai jong ka seng.
Haba kren ha ki lat pathai khubor la iathuh ha kane ka sngi la jied ruh ar ngut ki Assistant general secretary, u Bah Wyrwan Sohtun nalor u bah Louis Dohtdong, ki ar ngut ki vice president, u bah Kyllang S Thongni nalor u Bah Nelson Kharbani. Ha kane ka sngi la jied ruh ia u bah Kyrshanbor Marbaniang kum u Legal Adviser ka seng.
Ban pynkham suk shuh shuh ia ka jingtrei kam ka seng la buh ia ki nongpeit na ka bynta ki District bapher bapher jong ka jylla, ha West Khasi Hills la buh ia u Bah Kyllang S Thongi, Ri Bhoi District bah Louis Dohtdong, South West Khasi Hills Bah Nelson Kharbani, West Jaintia Hills Damonmi Dkhar.
Haba ia dei bad ka Garo Hills la seng kala shaniah ha u President ban peit ia ka Garo Hills District bad ia ki ar ngut ki Assistant Secretary bad ar ngut ki Vice President u general secretary ba thymmai bad u Legal Adviser un peit ia ka jylla baroh kawei.
U bah Kharbani u la ong ba ha ka kam paidbah ki don kiba mih bad ki don kiba rung, kum ka seng mynta ka sngi la ioh ban pynsmai ia u Bah Cyprian Dkhar kum u General secretary ka seng bad la don run kiba rung thymmai hapoh jong ka seng.
Haba ia dei bad ka kam General secretary ka long ba na ka liang jong ka seng kala don ka jingpyrkhat ba u general secretary u dei ban dei na Shillong ban suk ka jingtrei kam dei halor kane ka nongrim i mat ba u general secretary barim ka seng u la iehnoh kam, ka seng ka kitbok bad ka pynpaw ia ka jingsngewnguh ia kaei kaba u la leh na ka bynta ka seng.
Ha kane ka sngi la pynsmai ia kine ki nongkitkam thymmai jong ka seng da u President bad kine ki riew rangbah kiba la jied mynta ka sngi kin ia kit ia bah lang ia ka jingdon kam jong ka jaidbynriew.
